ଗୁଡ୍ ମଣିଙ୍ଗ୍

ଶୀତୁଆ ସକାଳ ବୁକୁଥରା ଶୀତ

ଘନ କୁହୁଡ଼ି ଯେ ପଡ଼ିଥାଏ 

ହେଲେ ଉଠିବାକୁ ହୁଏନାହିଁ ଇଚ୍ଛା

ଆଲାରାମ୍ ବାଜି ବାଜି ରହିଯାଏ ।

ଶୁଭୁଥାଏ ପରା ପକ୍ଷୀଙ୍କ କାକଳି

ସତେ କୁହନ୍ତି ଶୁଭ ସକାଳ

ଦାଣ୍ଡ ଖରକିବା ଶବଦ ଶୁଭଇ

କେହି ବାହାରନ୍ତି ତୋଳି ଫୁଲ ।

ପ୍ରଭାତ ଭ୍ରମଣ ଦେହ ପାଇଁ ହିତ

ଉଠି ଚାଲନ୍ତି ଭ୍ରମଣକାରୀ

ନବବଧୂ ପରା ସଅଳ ଉଠିସେ

ଦେଇଥାଏ ନିତ୍ୟକର୍ମ ସାରି ।

ଡ୍ରେସିଙ୍ଗ୍ ଟେବୁଲ୍ ସମ୍ମୁଖରେ ବସି

ପ୍ରିୟା ସଜାଏ ରୂପକୁ ତା'ର

ସକାଳ ହେଲାଣି ଉଠିପଡ଼ ତୁମେ

ଏଣେ ଡାକୁଥାଏ ବାରମ୍ଵାର ।

ପ୍ରେମିକ ପ୍ରବର ଘୋଡ଼ିଘାଡ଼ି ହୋଇ

ଶୀତେ ରହିଥାଏ ଚେଇଁ ଶୋଇ

ଭଲ ଲାଗେ ପ୍ରିୟା ଗୁଡ୍ ମଣିଙ୍ଗ୍ କହି

ଯେବେ ଦିଏ ନିଦରୁ ଉଠେଇ ।

ଗୁଡ୍ ମଣିଙ୍ଗ୍ ସହ ଭାରି ଭଲ ଲାଗେ

ପ୍ରେମ ଭରା ବେଡ୍ ଟି ର ସ୍ଵାଦ

ଭଲପାଏ ବୋଲି କହିଦେଲେ ପ୍ରିୟା

ମନ ହୋଇଯାଏ ପ୍ରଫୁଲ୍ଲିତ ।।