ଗୋପଦାଣ୍ଡ ତୋତେ ମନା
ଗୋପଦାଣ୍ଡ ତୋତେ ମନା
ଗୋପଦାଣ୍ଡ ତୋତେ ମନାରେ କାଳିଆ
ଯମୁନା ହୋଇଛି ମନା
ମନା ବୃନ୍ଦାବନ ନିକୁଞ୍ଜ କାନନ
ମନା ମୂରଲୀ ମୂର୍ଚ୍ଛନା
ରାଧାରାଣୀ ବିମନା
ଅଧା ରହିଗଲା ତା ବାସନା
ଗୋପୀପ୍ରେମ ହେଲା ବିଡ଼ମ୍ବନା |(1)
କାନ୍ଦି କାନ୍ଦି ନନ୍ଦ ହୋଇଲେଣି ଅନ୍ଧ
ଯଶୋବନ୍ତୀ ବାଇଆଣି
କରଜରେ ସ୍ଥିତ ସର ନବନୀତ
ଶୁଖି ବାସି ହୋଇଲାଣି
ଗାଭୀକୁଳ ବିକଳ
ତୃଣ କରୁନାହାନ୍ତି କବଳ
ରୁଷ୍ଟ ସୁଦାମ ମଧୁମଙ୍ଗଳ |(2)
ନଯିବୁ ମଥୁରା ଦ୍ୱାରାବତୀ ପରା
ଚାଲାକି ପଡ଼ିଛି ଧରା
କୁଜି କୁଜ ହରା ମତ୍ତନାଗ ଦଳା
ମଞ୍ଚରେ ମାତୁଳ ମରା
ଘରବୁଡ଼ା ନାଗର
କଉରବ ବଂଶ ନାଶକର
କୁଳବୁଡ଼ା କପଟି ଶେଖର |(3)
ହସ୍ତିନାତ ମନା ନବଦ୍ୱୀପ ମନା
ମନା ଗିରି ଗୋବର୍ଦ୍ଧନ
କ୍ରୋଧିତା ଗାନ୍ଧାରୀ ଲକ୍ଷ୍ମୀପ୍ରିୟା ଭାରି
ଚାହିଁବେ ନାହିଁ ବଦନ
ଏବେ ନୀଳକନ୍ଦରେ
ଥାଅ ବ୍ରହ୍ମଦାରୁ ସ୍ୱରୂପରେ
କୃପାବାରି ବର୍ଷ ଉତ୍କଳରେ |(4)