ଗଣପର୍ବ ନୂଆଖାଇ

 ଭାଦ୍ରବ ମାସର ଶୁକ୍ଳ ପକ୍ଷ ଆଜି 

 ନୂଆଖାଇ ଭାବେ ଖ୍ୟାତ

 ପଶ୍ଚିମ ଓଡ଼ିଶା ଉତ୍ସବ ମୁଖର 

 ସର୍ବେ ଆଜି ଆନନ୍ଦିତ ।

 ବାରମାସେ ତେର ପରବ ଉତ୍କଳେ 

 ପାଳିଥାନ୍ତି ଆନନ୍ଦରେ 

 ସ୍ନେହ ସରାଗର ନୂଆଖାଇ ପର୍ବ 

 ଭାଇଚାରା ଏକତାରେ ।

 ଏକତା ମୈତ୍ରୀର ମହୋତ୍ସବ ପୁଣି 

 ଭାଇ ଚାରାର ପରବ 

 ଗ୍ରାମରୁ ସହର  ସଭିଏଁ ପାଳନ୍ତି 

 ଭୂଲି ଜାତି ଭେଦ ଭାବ ।

 ନୂଆ ନୂଆ ଧାନ ନୂଆ ନୂଆ ଜାମା 

 କ୍ଷୀରି ପିଠା ଭୋଗ କରି 

 ନବାନ୍ନ ବାଢିକି ଇଷ୍ଟଙ୍କର ଠାରେ

 ଵଡଙ୍କୁ ଜୁହାର କରି ।

 କ୍ଷୀରି ପୁରି ପିଠା ଭଳିଭଳି ଭୋଗ 

 ସମର୍ପିଣ ଇଷ୍ଟଦେବ

 ନବାନ୍ନ  ପ୍ରସାଦ ଏକତ୍ର ଖାଆନ୍ତି 

 ଭୂଲି ହିଂସାଦ୍ୱେଷ ଭାଵ ।

 ଦେଶ ବିଦେଶରୁ ସଭିଏଁ ଫେରନ୍ତି 

 ଆସିଗଲେ ନୂଆଖାଇ

 ଭାଇ ବନ୍ଧୁ ସହ ଆନନ୍ଦେ ନାଚନ୍ତି

 ଡାଲ୍ ଖାଇ ଗୀତ ଗାଇ  ।

 ପର ଆପଣାର ଭୂଲି ଭେଦଭାବ

 କୋଳାକୋଳି ହୋଇକରି

 ନୂଆଖାଇ ପର୍ବ ପାଳନ କରନ୍ତି 

 ଇଷ୍ଟ ଦେବୀ ପୂଜା କରି ।

           

 ବରଷକ ଥରେ ଆସେ ନୂଆଖାଇ 

 ଖୁସିର ପସରା ନେଇ 

 ହସଖୁସି ହୋଇ ପାଳନ୍ତି ସମସ୍ତେ

 ହୋଇଣ ଭଉଣୀ ଭାଇ ।

 ଓଡ଼ିଶା ମାଟିର କୃଷି ପର୍ବ ଏହି

 ନୂଆଖାଇ ଗଣ ପର୍ବ

 ଆମରି ସଂସ୍କାର ଆମରି ସଂସ୍କୃତି

 ହେଉ ଆମ ପାଇଁ ଗର୍ବ ।

 ସ୍ନେହଶ୍ରଦ୍ଧା ମୈତ୍ରୀ ପ୍ରେମର ପରବ

 ଆସିଅଛି ନୂଆଖାଇ

 ସଭିଙ୍କୁ ବାନ୍ଧିଛି  ଗୋଟିଏ ରଜ୍ଜୁରେ 

 ଏକତାର ବାର୍ତ୍ତା ଦେଇ ।

 ନୂତନ ଉତ୍ସାହ ନୂଆ ଉନ୍ମାଦନା

 ନୂଆନୂଆ ଆଶାନେଇ 

 ବରଷକେ ଥରେ ପାଳନ୍ତି ସଭିଏଁ 

 ମାନ ଅଭିମାନ ଭୂଲି ।

 ଭାଇ ଚାରାର ଏ ନିଆରା ପରବ

 ଆସୁଥାଉ ପ୍ରତି ବର୍ଷ 

 ଦୁଃଖଚାଲିଯାଉ ଏ ସାରାସଂସାରୁ 

 ଭରିଦେଉ ମନେ ହର୍ଷ ।