ଘର

ସରଗ ଠାରୁ ବି ଅଧିକ ସୁନ୍ଦର

ଅଟଇ ଆମର ଘର

କେତେ ମାଡଗାଳି କେତେ ରାଗଋଷା

ମନରେ ନଥାଏ କାର ॥

ବାହାର ଖବର ବାପା ବୁଝିଥାନ୍ତି

ବୋଉ ବୁଝିଥାଏ ଘର

ପାତର ଅନ୍ତର ନଥାଏ ମନରେ

ସମାନ ସ୍ନେହ ଆଦର ॥

ବାପଠାରୁ ବେଶୀ ବୋଉ ମାରିଥାଏ

ଖାତିର୍ ନଥାଏ କାର

ବାପାଙ୍କର ଗାଳି ବେଶୀ ବାଧିଥାଏ

ତେଣୁ ମନେଥାଏ ଡର ॥

ପୁନେଇଁ ପରବ ଅତି ମନଛୁଆଁ

ଅଦିନିଆ ଦେଖାଚାହାଁ

ବାପା ଆଣିଦ୍ୟନ୍ତି ନୂଆ ଜାମାପଟା

ବୋଉ କରେ ପିଠାପଣା ॥

ଛୁଟିରେ ସମସ୍ତେ ଘରକୁ ଆସନ୍ତି

ବନ୍ଧୁ ବାନ୍ଧବ ଓ ଗୋଷ୍ଠୀ

ଛୁଟି ଚାଲିଯାଏ ଛୁଟି ର ବାଟରେ

ଜଣାପଡେ ନାହିଁ କିଛି ॥

କେତେ ସ୍ମୃତି କେତେ ଅନୁଭୂତି ନେଇ

ଗଢା ଆମ ଏଇ ଘର

ହେଇଥାଉ ପଛେ ମାଟି କାନ୍ଥ ଟିଏ

କଥା ସରିବନି ତାର ॥

ଚନ୍ଦନ ମିଶ୍ର