ଘର

ଏବେ ଯୋଉ ବାତ୍ୟା ହେଲା

ଆମ ଗାଁ ବୁଢ଼ା ବରଗଛଟା ଗଲା

ଦଳେ ପକ୍ଷୀ ରହୁଥିଲେ

କାହିଁ କେତେ ଦିନୁ

ଉଡ଼ିଗଲେ କୁଆଡ଼େ କେଜାଣି

ଶୁଣୁଥିଲି ପାଖ ଗାଁର

କୋଉ ଗୋଟେ ଗଛରେ ବସାବାନ୍ଧି

ରହୁଛନ୍ତି ଏକାଠି ।

ଆମ ଗାଁ ମୁଖିଆ

ହରିଆ ପଧାନ ବୁଢ଼ା

କୋଉ ସାତପୁରୁଷର ଘରେ

ରହୁଥିଲା ଏକାଠି

ଗଛପଡ଼ି ବୁଢ଼ା ମଲା

ଘର କିନ୍ତୁ ଯେମିତି ସେମିତି

ଯାହା ଖାଲି ଦୁଇ ପୁଅ

ମଝିରେ ବାଡ଼ ଟେକି ରହୁଛନ୍ତି ସେଇଠି।

ପଚାରିଲେ କୁହନ୍ତି

ଆମେ ଏବେ ବି ଏକାଠି

ଚଳିବାକୁ ଅସୁବିଧା ହେଲାତ

ବଡ଼ଭାଇ ସେଇଠି

ଆଉ ମୁଁ ଏଇଠି !!