ଘର ମୋ ହେବ ସରଗ

ଝାଟି ମାଟିର ଏ କୁଡ଼ିଆ ଖଣ୍ଡକ

ମୋ ପାଇଁ ସରଗ ପୁରୀ

ବାପା, ମାଆ, କାକା, ଭାଇ, ଭଉଣୀ ରେ

ଘର ମୋ ଉଠିଛି ପୂରି l

ଖରା, ବର୍ଷା, ଶୀତ, କାକର ସହିଛି

ଗଛ ତା'ର ଚାରିପାଖେ

ଝଡ଼ ବତାସକୁ ନ କରି ଖାତିରି

ଆମକୁ ରଖିଛି ସୁଖେ l

ଘର ଅଗଣାର ଟଗର, ମନ୍ଦାର,

ସେବତୀ, କାମିନୀ, ଯୁଇ

ହସି ହସି ମୋତେ ଡାକନ୍ତି ପାଖକୁ

ଆମ ଘରେ ପୂଜା ପାଇଁ l

ସକାଳ ପାହିଲେ ଘର ମଥାନରେ

କୂଆ ରାବେ କାଆ କାଆ

ସଞ୍ଜ ନଇଁଗଲେ ଜାଳି ସଞ୍ଜବତୀ

ଶୁଭ ମନାସନ୍ତି ମାଆ l

ସଫା ସୁତୁରା ମୁଁ ରଖିବି ତାହାକୁ

ସଜାଇ ସବୁ ଦରବ

ମୋ ହାତ ପରଶେ ଝଲସି ଉଠିବ

ଘର ମୋ ହେବ ସରଗ l