ଘେନ ମୋର ନିବେଦନ

ନମେ ଅକିଞ୍ଚନ ଘେନ ନିବେଦନ 

    ପାଦପଦ୍ମେ କରେ ଅଳି

ଅଜ୍ଞାନ ଅନ୍ଧାର ଦୂରକର ମାତା

    ଜ୍ଞାନର ପ୍ରଦୀପ ଜାଳି l

ତୁମରି ଆଶିଷ ବୁନ୍ଦା ବୁନ୍ଦା ହୋଇ

     ଜ୍ଞାନ ବାରି ପଡୁ ଝରି

ବାକି ଦିନ ମୋର କଟି ଯାଉ ମାଗୋ

     ତୁମ ନାମ ତୁଣ୍ଡେ ଧରି l

ବିଷ୍ଣୁ ବିନୋଦିନୀ ମାଗୋ ବୀଣାପାଣି

   ବିଦ୍ଯାଦାତ୍ରୀ ମହାମାୟୀ

ମୁଁ ଛାର ଅଧମ ତୋଷିକି ପାରିବି

    ଜଣାଣ ତୁମରି ଗାଇ l

ଗଳାରେ ଲମ୍ବିଛି କୋଟି ମୁକ୍ତା ହାର

   ହସ୍ତରେ ପୁସ୍ତକ ବୀଣା

ଏ ମହୀ ମଣ୍ତଳେ ତୋ ଆଶିଷ ବିନା

   ସର୍ବେ ଯେ ମୁର୍ଖରେ ଗଣା l

ତୁମ ଦୟା ହେଲେ ଏ ମହୀମଣ୍ତଳେ

    ମରି ମୁଁ ଅମର ହେବି

କବିତା ରୂପରେ ସବୁରି ହୃଦୟେ

    ସଦା ମୁହିଁ ରହିଥିବି l

ଶ୍ବେତ ହଂସ ଶ୍ବେତ ପଦ୍ମେ ବିଜେ ସଦା

    ଶ୍ବେତ ବସ୍ତ୍ର ପରିଧାନ

କିଞ୍ଚିତେ ଭକତି ଘେନ ମାଗୋ ତୁହିଁ

    ଏହି ମୋର ନିବେଦନ ll