ଗାଁର୍ ଟୁକେଲ୍

ଗାଁର୍ ଟୁକ୍'ଲିର୍ ସୁନ୍ଦ୍'ରି ମୁହୁଡା

ମନ୍ କେ ନେସି ଟାନିଁ

ତାର୍ କଥାବାର୍ତା ସୁରୁତ୍ ଲାଗସି

ଜେନ୍'ତା ପାନିଁ ମିଠା ଚିନିଁ

ଛମ୍-ଛମ୍ ତାର୍ ଗୁଡର୍ ପାଏଜଲ୍

ଫର୍-ଫର୍ ତାର୍ ଉଢ୍'ନିଁ

ରୁକି-ରୁକି ତାର୍ ପାଉଡର୍ ମଖା

ଧୁଇ-ଧୁଇ ମୁହୁଁ ପାନିଁ

ନଖେ ନଖ୍'ପାଲିସ୍ ହାତେ ମେହେନ୍ଦି

ଆଖିଁ କଜଲ୍ ଗାରେ ଘାରି

ଗାଁ ମୁଡସାର୍ ଶିବ୍'ଗୁଡି କେ ଜାଏସି

ଚଁପା-ବେଲ୍'ପତର୍ ଥାଲେ ଧରି

ଶିବ୍'ଗୁଡି ଠାନେଁ ପାଏନ୍ ଢାଲସି

ଡାକି ଡାକି ପଶୁପତି !

ମନେଁ ମାଗୁଥିସି ସପନ୍ ରଜା କେ

ହଉ ବଲି ଜୀବନ୍'ସାଥି

ବେଲ୍'ପତର୍ ଟେ ପଡି ଗଲା ବେଲେ

ଟପ୍'ନେଁ ନେସି ବେଟି

ଚଢାଲା ସଏଲ୍'ତା ଜଦି ଲିଭିଗଲା

ମନ୍ ଜାଏସି ତାର୍ ଫାଟି