ଗାଇବି ମୁଁ ତଵ ନାମ

ଏମିତି କରୁଣା କର ପ୍ରଭୁ ମୋତେ

ଭଜିବି ଜୀବନ ସାରା

ଛାଡ଼ି ଲୋଭ ମୋହ ମରୁ ମରୀଚିକା

ଦେଵି ତୁମ ପାଶେ ଧରା  l

ଜୀବନ ଜଂଜାଳ ଯନ୍ତ୍ରଣାରୁ ପ୍ରଭୁ

ନିମିଷକେ କର ମୁକ୍ତ

ଆତ୍ମା ପରମାତ୍ମା ମିଳନ ହୋଇବ

ବନ୍ଧନଟି ହେବ ଶକ୍ତ l

ପର ଉପକାରେ କଟିବ ଜୀବନ

ହିଂସା ଠାରୁ ରହି ଦୂରେ

ତଵ ପଦ ଧ୍ୟାୟୀ ଗାଇବି ନାମକୁ

ଦୃଢ଼ ଉନ୍ମୁକ୍ତ ସ୍ଵରେ  l

ଚାହୁଁଛି ଏ ମନ ଗୋପ ବୃନ୍ଦାବନ

ଦେଖିବି ଜୀବନେ ଥାଇ

ହେବି ଆତ୍ମହରା ପରମ ତୃପ୍ତିରେ

ସମର୍ପଣ ଭାବ ନେଇ  l

ମିଛ ଏ ସଂସାର ସାଥୀ ଦିଦିନର

ପାପ ପଙ୍କେ ହେଉ ଘାଣ୍ଟି

କହି ମୋର ମୋର କରୁଛୁ ଚିତ୍କାର

ଶୁଖିଯାଏ ପରା ତଣ୍ଟି l

ତଵ ପଦରେଣୁ ଝରିପଡ଼ୁ ଥାଉ

ଛାର ଏ ଭକତ ଶିରେ

ଏମିତି ଆଶିଷ ଦେଇ ପ୍ରଭୁ ମୋତେ

ଧନ୍ୟ କରିଦିଅ ବାରେ l