ଏତିକି ମାଗୁଣି ପ୍ରଭୂ

ଜୀବନ ଚାଲିଛି ଯଦି ତା ବାଟରେ

ତୁମକୁ କିଆଁ କେ ଖୋଜିବ ପ୍ରଭୂ

ତୁମ ସହ ଯୋଡା ସମ୍ପର୍କର ଡୋର

ସତେ କଣ ଆଜି ଅସାର ସବୁ I

ସଂସାର ସାଗରେ ଭାସୁଛି ଜୀବନ

ଆହୁଲାଟା ପରା ତୁମରି ହାତେ

ଏ ଭବ ସାଗରେ ତୁମେ ନାଉରିଆ

ଦିତୀୟ କେ ନାହିଁ ଏଇ ମରତ୍ତେ I

ତୁମ ନାମ ଜପି ନିଦ ହଜେ କାର

ସନ୍ୟାସୀ ଜୀବନ ବିତାଏ କିଏ

ତମକୁ କେ ଭାବେ ଜୀବନ ସର୍ବସ୍ୱ

ମରି ମରି ନିତି ଜୀବନ ଜୀଏଁ I

ଜୀବନର ତୁମେ ଏକମାତ୍ର ସତ୍ୟ

ତୁମ ବିନା କିଛି ପଥ ହିଁ ନାହିଁ

ତୁମେ ଜଗନ୍ନାଥ ଜଗତ କରତା

ଅସୀମ ଅନନ୍ତ ଜଗତ ସାଇଁ I

କେହି ଦେଖିନାହିଁ ତୁମକୁ ସାଆନ୍ତେ

ଅନୁଭବେ ତୁମେ ଅନ୍ତରେ ଥାଅ

ଭକତ ଜନକୁ ଭୁଲି ଯାଅ ନାହିଁ

ହାତଧରି ବାଟ କଢାଇ ନିଅ I