ଏତିକି ଇଚ୍ଛା

ମୁଁ ହେବି

ଠିକ ସେଇ ମୁନିଆ ସେଫଟିପିନ ପରି

ଯିଏ ଶକ୍ତ ଭାବେ ଜାବୁଡ଼ିଧରିବ

ତୁମ ଶାଢ଼ୀକୁ

ମେଳା ବୁଲି ଆସିଥିବା

କୁନି କିଶୋରଟେ ପରି ।

ମୁଁ ହେବି

ଠିକ ସେଇ ଖଇରୀ ନେଲପଲିସ ପରି

ଯିଏ ନିଃସଙ୍କୋଚରେ ଘୋଡାଇପାରିବ

ତୁମ ପରିଶ୍ରମର

ସେ ସମସ୍ତ ଅଲିଭା ଦାଗକୁ ।

ମୁଁ ହେବି

ଠିକ ସେଇ ଅଣ୍ଟାସୂତା ଚଉଡ଼ାର

ପାଦ ପାଉଁଜି ଟେ ପରି ,

ଯିଏ ନିଜ ଶବ୍ଦରେ ଧରିରଖିବ

ଆଜୀବନ

ତୁମ ଚଗଲା ବୟସକୁ ।

ମୁଁ ହେବି

ଠିକ ସେଇ

ବାଇଶ ବର୍ଷୀୟ ପ୍ରେମିକର

ହୃଦୟଟେ ପରି ,

ଯାହାକୁ ଯେତେଥର ଚାହିଁବ

ଯେତେବେଳେ ଚାହିଁବ

ଚୋରି କରିପାରିବ ,

କେହିନଥିବେ ନିଜର

ଅଧିକାର ଜାହିର କରିବାକୁ ।