ଏମିତି ସୁପରହିରୋ

ଏମିତି ସୁପରହିରୋ ଦେଖ ନୟନ 

ଟାଙ୍ଗିଆ ଧରି ଥରାଏ ବିଶ୍ୱ ଭୁବନ |

ହାତୀନାହିଁ ଘୋଡାନାହିଁ ନାହିଁ ବାହନ

ରଥ ନାହିଁ ବର୍ମ ନାହିଁ ଏକା ଗମନ |

ଚକ୍ରବର୍ତ୍ତୀ ନରପତି କ୍ଷତ୍ରି ଦୁର୍ଜନ

ଲକ୍ଷ ଲକ୍ଷ ମେଳି ହୋଇ କରନ୍ତି ରଣ |

ଛାଗ ପଲେ ବାଘ ପରି ଦିଶେ ଶୋଭନ

ପିପୀଲିକା ସମ କରେ ଅରି ମର୍ଦ୍ଦନ |

ଏକା ହସ୍ତୀ ରଥୀ କ୍ଷତ୍ରି କରେ ନିଧନ

ପର୍ଶୁ ଧନୁ ଗଦା ଖଡ୍ଗ କରେ ଧାରଣ |

ସସ୍ରବାହୁ କାର୍ତ୍ତବୀର୍ଯ୍ୟ ସହସ୍ରାର୍ଜୁନ

ଦତ୍ତାତ୍ତେୟ ବଳେ ଜିଣି ତିନିଭୁବନ |

ପିତା ଯମଦଗ୍ନିଙ୍କୁ ସେ କରୁ ନିଧନ

କ୍ଷତ୍ରି ନିସୂଦନ ପାଇଁ ବଳିଲା ମନ |

ପିତୃ ହତ୍ୟା ପ୍ରତିଶୋଧ ନେଲେ ଵହନ

କାର୍ତ୍ତବୀର୍ଯ୍ୟ ସସ୍ର ବାହୁ କଲେ ଛେଦନ |

କୁକ୍ଷତ୍ରି ରକତେ ଧରା କଲେ ପ୍ଲାବନ

ଏକବିଂଶ ବାର ଭ୍ରମି ବିଶ୍ୱ ଭୁବନ |

ନାମ ଶୁଣୁ ଯୋଦ୍ଧାଙ୍କର ମୂର୍ଦ୍ଧାପାତନ

ଦଶରଥ ଲୁଚିଥିଲେ ନାରୀ ଗହଣ |

ଗଣେଶଙ୍କ ଏକଦନ୍ତ କଲେ କର୍ତ୍ତନ

ଭାର୍ଗବ ପରଶୁରାମ ବୀର ବନ୍ଦନ |

ବିଷ୍ଣୁ ଷଷ୍ଠ ଅବତାର ଡରେ ଶମନ

ଗୁରୁ ଶ୍ରେଷ୍ଠ ଅଦ୍ଵିତୀୟ କୋଟି ନମନ |

ଭୀଷ୍ମ ଦ୍ରୋଣ କର୍ଣ୍ଣ ପରି ଶିଷ୍ୟ ଉତ୍ପନ୍ନ

ରାମେ କୃଷ୍ଣେ କଲେ ଧନୁ ଚକ୍ର ଅର୍ପଣ |

ଚିର ଅମର ଯତୀନ୍ଦ୍ରପାଦେ ଶରଣ

ସୁପର ହିରୋ ଚରିତ ପାପ ନାଶନ |