ଏକତା
ଏକତା
ପଡୁଅଛି ଦେଖା ଶତ୍ରୁ କେହି ଏକା
ଆମେ ଅଛୁ ଛଅଜଣ
ଆଗକୁ ସେ ବଢ଼ି ପାରିବନି ଲଢ଼ି
ସମ୍ଭାଳୁ ଏଥର ରଣ ।
ରହିଥିଲେ ଯୋଡ଼ା ସରି ନୁହଁ ଘୋଡ଼ା
ହେଲେ ହେଉ ଯେତେ ଖର
ଚାଲି କଉଶଳ ନଜାଣି ବୃଷଳ
ମନରେ ଭରିଛି ଡର ।
ଜାଣିଛୁ ଏକଥା ରହିଲେ ଏକତା
ବିପଦ ନଥାଏ ତିଳେ
ପାରିଲୁଣି ବୁଝି ରଣକ୍ଷେତ୍ରେ ଯୁଝି
କିଭଳି ବିଜୟ ମିଳେ ।
ଆତଙ୍କୀଙ୍କୁ ପୋଷି ଦେଶର ପଡୋଶୀ
ଉଣ୍ଡି ବସିଛନ୍ତି ଖଞ୍ଜ
ଜାଣେନାହିଁ ଲୁବ୍ଧ ପରମାଣୁ ଯୁଦ୍ଧ
ନୁହେଁ ଏକ ଶତରଞ୍ଜ ।
ରଖିଛୁ ସଂକଳ୍ପ ଗଢିଛୁ ପ୍ରକଳ୍ପ
ଦେଶର ବିକାଶ ପାଇଁ
ବୃଥା ଅପଳାପେ ଆମରି ପ୍ରତାପେ
ନିସ୍ତାର ପାଇବ ନାହିଁ ।
ଦୀନହୀନ ପ୍ରାୟେ ବିଶ୍ୱ ସମୁଦାୟେ
ନିତି କହି ନୂଆ ମିଛ
କଲେ ବି ଗୁହାରି ପ୍ରତିଥର ହାରି
ବେଳୁବେଳ ହୁଏ ନୀଚ ।
ଜେନିଭା ସଭାରେ ବିଶ୍ୱ ଦରବାରେ
ଏକଘରିଆ ସେ ଯେବେ
ମିଳିଲେ ସୁଯୋଗ ଛାଡିଯିବ ରୋଗ
କିପାଇଁ ଡରିବା ଏବେ ?