ଏଇଟି ମୋର ବହି

ଏଇଟି ମୋର ବହି

ରଙ୍ଗ ରଙ୍ଗିଆ ମଲାଟ ତାର

ନିଏ ମୋ ମନ ମୋହି ।

ଏଇ ବହିରୁ ପଢ଼େ ମୁଁ ପାଠ

ଏ ବହି ମୋତେ ଦେଖାଏ ବାଟ

ଅକ୍ଷର ଶିଖେ ଅକ୍ଷର ଲେଖେ

ଛବିକୁ ଦେଖି ମୁହିଁ ।

ବହିରେ ମୋର ବଡ଼ ସରାଗ

ଲଗାଏ ନାହିଁ ମଇଳା ଦାଗ

କଭର ଦେଇ ରଖାଇ ମୁହିଁ

 ଯେସନେ ନୂଆ ରହି ।

ଅବନା ପଢ଼େ ବନାନ ପଢ଼େ

ଖେଳନା ଗଢ଼େ ଛବି ସଜାଡ଼େ

ଶିଖଇ କଥା ହୁଏ ବକତା

ଉତ୍ତର ଦିଏ କହି ।

ଆଗ ଶ୍ରଵଣ ପରେ ପଠନ

ଲିଖନ ପରେ ପରିମାର୍ଜନ

ପ୍ରଶ୍ନ ଉତ୍ତର ହୋଇଲେ ସ୍ଥିର

ଖୋଜେ ମୁଁ ଆନ ବହି ।

ବହି ଆମର ଜ୍ଞାନ ଭଣ୍ଡାର

ସବୁ ସାଇତା ଗର୍ଭେ ତାହାର

ଗଣିତ ଇତିହାସ ଭୂଗୋଳ

ବିଜ୍ଞାନ ସାହିତ୍ୟ ହିଁ ।

ଧର୍ମ ପୁସ୍ତକ ଶ୍ରୀଭାଗବତ

ରାମାୟଣକୁ ମହାଭାରତ

ଗୀତିନାଟକ ସଂଗୀତ ଗୀତ

ମନକୁ ଯାଏ ଛୁଇଁ ।

ଯେତେ ପଢ଼ିଵ ସେତେ ଜାଣିବ

ପଣ୍ଡିତ ପଣେ ଗଣା ହୋଇବ

ଶିକ୍ଷିତ ହେବ ମଣିଷ ହେବ 

ବହିଠୁଁ ବନ୍ଧୁ ନାହିଁ ।

ପର ଆପଣା ନାହିଁ ତାହାର

ସଭିଙ୍କୁ କରେ ସମ ଆଦର

ବହି ଆମର ଅଟେ ନୟନ

ଅମୂଲ୍ୟ ଧନ କହି ।