ଏଇତ ଜୀବନ

ଢୋକେ ପିଇ ଦଣ୍ଡେ ଜୀଇଁବା ପ୍ରୟାସ

     କରୁଛି ମୁହୂର୍ତ୍ତ ଗଣି,

ଏଇତ ଜୀବନ କେବେ ମହା ଶୂନ୍ୟ

    କେବେ ବା ସୁବର୍ଣ୍ଣ ଖଣି ।। ୧

ଜୀବନଟା କେବେ ଫଗୁଣର ଫଗୁ

   ରଙ୍ଗରେ କରେ ବିଭୋର,

କେବେ ପୁଣି କାଳ ବଇଶାଖି ସାଜି

    ଅସ୍ତିତ୍ୱ କରେ ଅସ୍ଥିର ।। ୨

କେବେ ଏ ଜୀବନ ଲାଗଇ ଚନ୍ଦନ

    ପାଇ ମଳୟ ପରଶ,

କେବେ କେବେ ପୁଣି ଗ୍ରୀଷ୍ମପ୍ରବାହରେ

     ଭରଇ ହାଆ ହୁତାଶ ।। ୩

ଜୀବନ ହସଇ କେବେ କଳ ନଦୀ  

    ନବ ନିର୍ଝରଣୀ ସମ,

କେବେ ପୁଣି ସିଏ ତପ୍ତ ମରୁ ବାଲି

   ବଞ୍ଚିବା କରେ ବିଷମ ।। ୪

ଜୀବନଟା କେବେ କୋମଳ କୁସୁମ

     ଆଚ୍ଛାଦିତ ଚଲାପଥ,

କେବେ ପୁଣି ସାଜେ ଦୁର୍ଗମ ଦୁର୍ଭେଦ୍ୟ 

    କଣ୍ଟକିତ କଙ୍କରିତ ।।  ୫

ଜୀବନଟା କେବେ ନହୁଲି ବୟସ

   ପ୍ରଥମ ଆଷାଢ଼ ବିନ୍ଦୁ,

ଆଖିରେ ଶ୍ରାବଣୀ ସାଜି କେବେ ପୁଣି

     ସୃଜିଥାଏ ସାତ ସିନ୍ଧୁ ।।  ୬