ଏବେବି ବର୍ଷା ଆସେ

ବର୍ଷା ଭୁଲିନାହିଁ ମାଟିର ମୋହକୁ

ଭୁଲିନି ପ୍ରୀତିର ସ୍ୱର

ଶରତ ଆକାଶେ ବିଜୁଳି ଚମକେ

ବର୍ଷା ଆସେ ବାର ବାର I

ସବୁଜିମା ଭରା ମାଟିର ଛାତିକୁ

ବର୍ଷା ଯେବେ ଦିଏ ଛୁଇଁ

ହଜିଲା ଦିନର ସ୍ମୃତିକୁ ଉଖାରେ

ବିସ୍ମୃତ ଟାଙ୍ଗରା ଭୂଇଁ I

ଜୀବନ୍ୟାସ ଦିନେ ଦେଇଥିଲା ବର୍ଷା

ମରୁଯାତ୍ରୀ ପ୍ରାଣେ ଆଶା

ତା ପ୍ରୀତି ପରଶେ ଭିଜାଇଲା ପ୍ରାଣ

ଆଖିରେ ଭରିଲା ନିଶା I

ବରଷା ଭୁଲିନି ତୃଷିତ ପ୍ରାଣର

ଅନ୍ତହୀନ ଜ୍ୱାଳାମୁଖୀ

ସେଥିପାଇଁ ସିନା ଅବେଳରେ ଆସେ

ଶାନ୍ତ ହୁଏ ପ୍ରାଣ ପକ୍ଷୀ I