ଏ କି ଘର ?

ଝାଟିମାଟି ଘର, କାଦୁଅ କାନ୍ଥର

କେତେ ମନୋହର ଥିଲା l

ପରସ୍ପର ପ୍ରତି, ସ୍ନେହ ପ୍ରେମ ପ୍ରୀତି

ଭାବ ଭରି ରହିଥିଲା ll୧

କଂକ୍ରିଟି ଯେ ଘର, ଗାଆଁ ରୁ ସହର

ନାହିଁ ହୃଦୟ କାହାର l

ପରସ୍ପର ପ୍ରତି, ନାହିଁ ସେହି ପ୍ରୀତି

ହେଲା ହୃଦୟ ପଥର ll୨

କାହାକୁ କହିବା ଘର ?

ଯେଉଁ ଘରେ ଦିନେ, ଏକାଠି ରେ ଜନେ

କରୁଥିଲେ ଯେ ଆହାର l

ବୈକୁଣ୍ଠ ସମାନ , ଥିଲା ସେହି ଘର

ହେଲେବି ଝାଟିମାଟିର ll୩

ଆଜି ଯେ ସବୁଠି , ନାହାନ୍ତି ଏକାଠି

ଭାଇ ଭାଇ ସାତ ପର l

ହେଲେବି ସୁନ୍ଦର ,ମାରବଲ ଘର

ନାହିଁ ଭାବ ଆପଣାର ll୪

କାହାକୁ କହିବା ଘର ?

ଯେଉଁ ଘରେ ଦିନେ, ଲଘୁ ଗୁରୁ ଜନେ

ଦେଉଥିଲେ ସନମାନ l

ସନମାନ ଆଜି, ଲୁହେ ଯାଏ ଭିଜି

ନ ଦିଅନ୍ତି କେହି ଧ୍ୟାନ ll୫

ଯେଉଁ ଘରେ ଦିନେ, ଘରଣୀ ଯତନେ

ପାଳୁଥିଲେ ଓଷା ତେର l

ଓଷା ମାରଗୁଲି, ସଂକ୍ରାନ୍ତି ଯେ ହୋଲି

ବାସୁଛି ଆମିଷେ ପୁର ll୫

କାହାକୁ କହିବା ଘର ?

ଯେଉଁ ଘରେ ଦିନେ ,ସନ୍ଧ୍ୟା ଆଗମନେ

ଜାଳୁଥିଲେ ସଞ୍ଜ ବତି l

ଭାଗବତ ଗୀତା ,ଆଜି ଲାଗେ ପିତା

ଗଲାଣି ହେବାକୁ ସ୍ମୃତି ll୭

କେମିତି ସେ ଘର, ହୋଇବ ସୁନ୍ଦର

ନାହିଁ ଏଠି କେହି ନର l

ଯହିଁ ନାହିଁ ଶାନ୍ତି, ସ୍ନେହ ପ୍ରେମ ପ୍ରୀତି

କେମିତି ହୋଇବ ଘର ll୮

କାହାକୁ କହିବା ଘର?