ଏ ଜୀବନ ଚଲାପଥ

ଜୀବନଟା ନୁହେଁ ଖାଲି

ରାତି,ଦିନ,ମାସ ଅବା ବର୍ଷ

ଲମ୍ବା ଏକ ଚଲାପଥ

ଆଚ୍ଛାଦିତ ଭରା ଅବିଶ୍ୱାସ l

ଅଛି ଏଠି ପ୍ରବହମାନ

ଜୀବନ ତରଙ୍ଗ

କାମନା ବାସନା ଜର୍ଜରିତ

ଛଳନାର ରଙ୍ଗ

ନୁହେଁ କେହି ଚିରସ୍ଥାୟୀ ସତ

ସବୁ ଖାଲି ଦିଶଇ ବେଢ଼ଙ୍ଗ l

ଦଲକାଏ ପବନ ବି 

ଭାଙ୍ଗିଦିଏ ନୀଡ଼

ଅହଂକାର ଆବରଣେ

ଏ ଜୀବନ ଜଡ଼ l

ଆନ ସ୍କନ୍ଧେ ପାଦ ଥାପି

ଆକାଶକୁ ଛୁଇଁବାର

ଦୁର୍ବାର ପ୍ରଚେଷ୍ଟା,

କ୍ଷମତାର ସାଗରରେ

ଦେବା ପାଇଁ ବୁଡ଼

ମରଣ ଦୁଆରେ ବି ମଣିଷ 

ଦେଖାଉଛି ତୋଡ଼ l

ସ୍ୱଚ୍ଛ ମନଟିଏ ପାଇବାବି

ଏଠି ମହଙ୍ଗା

ଆଇନାବି ଦେଖାଉଛି

ପ୍ରତିବିମ୍ବ ଭଙ୍ଗା,

ଚାଲିଛି ଅହରହ ଅଙ୍କକଷା

ପୁଣି ଠିକ ଭୁଲର

ଅବିରତ ଦଙ୍ଗା l

ବଞ୍ଚିବାର ଆଶା ଏଠି

ଯାଉଛି ମଉଳି

ବାଳିକା ଟି ବଳାତ୍କାରେ

ପଡୁଛି ଝାଉଁଳି l

କିଏ ଏଠି ଭଲ ପୁଣି

କାହାସହ ଗଢ଼ିବ ସମ୍ପର୍କ,

ବାପା ହେଉ କି ସେ

ଭାଇ ଅବା ବନ୍ଧୁ 

ମନରେ ତା'ର ଅବିଶ୍ୱାସ

ଓ ଆଶଙ୍କାର ତର୍କ,

ପ୍ରତି ମୁହୂର୍ତ୍ତ ରେ ତାକୁ 

କରୁଛି କ୍ଷତାକ୍ତ l

ଭୁଷୁଡୁଛି ବିଶ୍ୱାସର

ବାଲି ବନ୍ଧ ତା'ର 

ପାଶବିକ ଭୋଗ ଲାଳସାରେ

ପଡୁଛି ସେ ବଳି

କେହି ତା'ର ମନ କଥା 

ପାରନ୍ତିନି କଳି l

ଆଖି ଥାଇବି ମଣିଷ

ଆଜି ଛଳନାରେ ଅନ୍ଧ

ତା'ଦୃଷ୍ଟି ରେ ବାରି ହୁଏ 

ହିଂସ୍ର ପଶୁତ୍ବର ଗନ୍ଧ ।