ଦଶଭୁଜା
ଦଶଭୁଜା
ଶିଉଳି ଫୁଲର ଚାଦର ଘୋଡାଇ
ଶରତ ଆସିଛି ଆଜି ,
ନଈପଠା ପୁଣି କାଶତଣ୍ଡି ଫୁଲେ
ସୁନ୍ଦର ହେଇଛି ସାଜି ।
ବନ ଉପବନେ ହୁରି ପଡ଼ିଅଛି
ମହାଶକ୍ତି ବିଜେ ପାଇଁ ,
ସମୟ ଯେ ଆଜି ଉଛୁର ହେଲାଣି
ତୁମ ଦେଖା କାଇଁ ନାଇଁ ।
ମାଦଳ ଢୋଲକ ତାଳ ସଙ୍ଗେ ତାଳ
ନନ୍ଦେ ଚାଲେ ପାଦ ସୁରେ ,
ମଣ୍ଡପ ଅଚିରେ ସାଜଇ ପ୍ରାନ୍ତରେ
ଉଲ୍ଲାସ ପୁରେ ସହରେ ।
ନୟନ ତୁମର ନାଶଇ ଅସୁର
ପାପୀ କୋଶ ଦୂରେ ଥାଏ ,
ଉଜ୍ଜ୍ୱଳ କିରଣ ନିରାପଦ ଯେଣୁ
ଭକତ ଶରଣ ଯାଏ ।
ସେନେହ ଏପରି ମମତାରେ ଭରି
ପଣତ ଦିଏ ଆସରା,
ପୁରେନାହିଁ କେବେ ଆପଣା କଳସୀ
ଆଦର ହୃଦେ ଅକ୍ଷରା ।
ବିଲ୍ଵଦଳ ମାଝୁ ପ୍ରକଟିତ ହୁଅ
ବିଶୁଦ୍ଧ ଘଟ ଉଦ୍ଧାର ,
ହେଲେଣି ଉତ୍ପାତ ମହିଷାସୁର ଯେ
ଆପଣା ଶୂଳେ ସଂହାର ।
ମହମହ ବାସେ ଯେନ ଚାରିପାଶେ
ଶାରଦୀୟ ମହାପୂଜା ,
ମର୍ତ୍ତ୍ୟେ ଅବତରି ମଉନେ ବିଚରି
ଶିଷ ଦିଅ ଦଶଭୁଜା ।
ତୁମେ ମନ୍ଦାକିନୀ ରମା କାତ୍ୟାୟନୀ
ଦୁଷ୍ଟ ବିନାଶି ରୁଦ୍ରାଣୀ ,
ମହୀ ଥରହର ପାପ କଷ୍ଟ ଭାର
ହେଉ ଶେଷ ଏ କାହାଣୀ ।