ଧାର୍ମିକ ନା ଅଧର୍ମୀ

ମୁଖ ନିସୃତଃ କବି – ସନ୍ଥ କବୀର ଦାସ 

ଅନୁବାଦ - Dr Subas Chandra Rout

ଧାର୍ମିକ ନୁହେଁ, ନା ମୁଁ ଅଧର୍ମୀ, ସାଧୁ ନୁହେଁ ବା ମୁଁ କାମୀ,

କହେ ନାହିଁ ମୁଁ, ଶୁଣେ ବି ନାହିଁ, ନୁହେଁ ସେବକ ବା ସ୍ୱାମୀ । 

ନୁହେଁ ମୁଁ ବନ୍ଧା, ନୁହେଁ ମୁଁ ମୁକ୍ତ, ନୁହେଁ ସୁଖୀ ବା ଦୁଃଖିତ,

କାହାଠାରୁ ମୁଁ ନିଆରା ନୁହେଁ, ନୁହେଁ କାହା ଅନୁରକ୍ତ ।

ନରକ ଯାତ୍ରା କରେ ନାହିଁ ମୁଁ, କରେ ନା ସ୍ୱର୍ଗକୁ ଯାତ୍ରା,

ସଭିଙ୍କ କର୍ମ ମୋ ନିଜ କର୍ମ, କର୍ମ ଠାରୁ ବି ନିଆରା ।

ବିରଳ କେହି ଏ ମତ ବୁଝେ, ଅଟଳ ଯେ ବସିଥାଏ,

କବୀର ଥାପେନି କାହା ଉପରେ, କାହା ମତ ନା ମିଟାଏ ।