ଦେହ

ଏଇ ଦେହ ପରା ଅଟେ ବୃନ୍ଦାବନ

ଲୀଳା କରୁଚ ହେ ପ୍ରଭୁ |

ବୃନ୍ଦାବନେ ଯାଇ ଖୋଜୁଚି ତୁମକୁ

ନାହିଁ ବୋଲି ଦିବ୍ୟଚକ୍ଷୁ ||୧||

ଅସ୍ଥି ମଜ୍ଜ ଗଢା ରୂପ ସୌନ୍ଦର୍ଯ୍ୟ ତ

ସବୁତ ଅଟଇ ମାୟା |

ପଞ୍ଚଭୂତେ ଗଢ଼ା କ୍ଷଣିକ ଭଙ୍ଗୁର

ମୃଣ୍ମୟର ଏହି କାୟା ||୨||

ମୃଣ୍ମୟ ମଧ୍ୟରେ ଚିନ୍ମୟ ରୂପରେ

ବ୍ୟାପିଅଛ ତୁମେ ପ୍ରଭୁ |

ମାୟା ଏ କାୟାର ଅଭାବରେ ପ୍ରଭୁ

କିପରି ଭଜିବି ପ୍ରଭୁ ||୩||

ଶରୀରରେ ଷଡ଼ ରିପୁ ରହିଛନ୍ତି

ଇନ୍ଦ୍ରିୟ ଆସକ୍ତ ହୋଇ |

ସ୍ୱଧର୍ମ ପାଳନ ଅଟଇ ବ୍ରହ୍ମାସ୍ତ୍ର

ଏହାକୁ ନାଶିବା ପାଇଁ ||୪||

କୌରବ ପାଣ୍ଡବ ବସିଛନ୍ତି ଦେହେ

ପ୍ରବୃତ୍ତି ନିବୃତ୍ତି ରୂପରେ |

ମହାଭାରତର ଲୀଳା ହେଉଅଛି

ଏହି ଶରୀର କ୍ଷେତ୍ରରେ ||୫||

ଅଧର୍ମ ବଢ଼ିଲେ ଧର୍ମଗ୍ଳାନି ହେଲେ

ଧରଣୀ ରୋଦନ କରଇ |

ସୃଷ୍ଟିରକ୍ଷା ପାଇଁ ଆସୁଛ ଧରାକୁ

ଭିନ୍ନ ଭିନ୍ନ ଦେହ ହୋଇ ||୬||

ମୀନ କଚ୍ଛପ ଶୂକର ନରହରି

ବାମନ ରୂପରେ ଆସିଲ |

ଭୃଗୁପତି ରାମ ହଳଧର ବୁଦ୍ଧ

କଳ୍କି ରୂପେ ଲୀଲା କଲ || ୭||

ଏହି ଶରୀର ତ ମୋକ୍ଷର ସିଡ଼ି

ଉପାୟତ କହିଦିଅ |

"କଣ୍ଟକନୈବ କଣ୍ଟକମ୍‍" ପରି

ନ୍ୟାୟ ପ୍ରଭୁ କରିଦିଅ ||୮||

ଦେହୀ ହୋଇ ତୁମେ ସର୍ବତ୍ର ବ୍ୟାପିଚ

ଦେହ ତ ନିମିତ୍ତ ଅଟଇ |

ଦେହ ଦେହୀ ଠାରୁ କିପରି ଅଭିନ୍ନ

ବତାଇ ଦିଅ ହେ ସାଇଁ ||୯||