ଡଙ୍ଗା

ଓଳିରୁ ଝରି ବରଷାପାଣି

ଗାଁ ଦାଣ୍ଡେ ଯେବେ ଛୁଟେ,

ଚପଳମତି ଶିଶୁର ଓଠେ

ହସର ଫୁଲ ଫୁଟେ ;

କୁନିହାତର କାଗଜ ଭାଙ୍ଗେ

ଭାସଇ ପାଣି ସୁଏ

ଡଙ୍ଗାଟିଏ ମୁଁ ଡଙ୍ଗାଟିଏ ।।

ଚଷାପୁଅଟା ଢାଳେ ତୋରାଣି

ଅରୁଆକୁଣ୍ଡାପେଜ,

ଗାଈବାଛୁରୀବଳଦ ପାଇଁ

ଖାଇବା କରେ ସଜ ;

ସବୁରି ତୁଣ୍ଡ ଦେହକୁ ମୋର

ସରାଗେ ଅତି ଛୁଏଁ

ଡଙ୍ଗାଟିଏ ମୁଁ ଡଙ୍ଗାଟିଏ ।।

ସାଗରୁ ମାଛ ଆଣଇ ଛାଣି

ବିକି ବଜାର ହାଟ,

ଜୀବିକାଜାଲପାଲକୁ ନେଇ

ପୋଷଇ ତା'ର ପେଟ ;

ନାବିକ ସୁଖଦୁଃଖର ସାଥି

କାତଟି ବାହିନିଏ

ଡଙ୍ଗାଟିଏ ମୁଁ ଡଙ୍ଗାଟିଏ ।।

ଭାଗ୍ୟର ଡୋର ନେଉଛି ଟାଣି

ସଂସାର ସିନ୍ଧୁ ପରେ,

ପ୍ରାଣ ସଉଦା କରଇ କାଳ

ଧରମ ନିକିତିରେ ;

ଦଇବ ମୋର ଚାଳକ ସାଜି

ଦିଗକୁ ମୋଡ଼ ଦିଏ

ଡଙ୍ଗାଟିଏ ମୁଁ ଡଙ୍ଗାଟିଏ ।।