ଢିଙ୍କି

 

ସରଗକୁ ଗଲେ  ଧାନ ସେ କୁଟଇ

         ଢିଙ୍କି ଯେ ନାଆଁଟି ତାର

ଚାଷୀ ମୂଲିଆର    ଭଙ୍ଗା ଚାଳିଆରେ 

       ରହିଥାଏ କରି ଘର ll 1

ପୁନେଇ ପରବ     ଓଷା ବ୍ରତ ହେଲେ

       ଲୋଡ଼ା ପଡେ ଆଗ ସିଏ

ଅରୁଆ ଚାଉଳ   ଝୋଟିଚିତା ଆଣ

          ଲାଗି ଚୂନା କୁଟା ଯାଏ ll 2

ମାଆ ଭଉଣୀଏ    ମିଶି ଯେ କୁଟନ୍ତି

       ଜେଜେମା ବୁଲାଏ ହାତ

ମଧୁର ଆଳାପ     ଚାଲିଥାଏ ସିନା

       ନିଷ୍ଠାରେ ପାଳନ୍ତି ବ୍ରତ ll 3 

ଗରିବ ମୂଲିଆ   ଖଟିଖିଆ ଯେବେ

      ସାହୁ ଘରୁଆଣେ ଧାନ

ସେ ଧାନ ଉଁଷେଇ ଖରାରେ ଶୁଖାଇ

      ଢିଙ୍କିରେ କୁଟଇ ପୁଣ ll 4     

କୁଟି ଖାଇବାକୁ    କାଟି ପିନ୍ଧିବାକୁ

     ଗାନ୍ଧୀ ନୀତି ଆଜି କାହିଁ

ଗାଆଁ ଗହଳିରେ   ବିଦ୍ୟୁତ ହଲର

      ଢିଙ୍କି ଯେ ମିଳଇ ନାହିଁ ll5     

ଦେଖିବା ସପନ  ଓଡ଼ିଆ ଘରର

       ଢିଙ୍କି କୁଟା ସେଇ ଭାତ

ଭରି ରହି ଥାଏ    ଭିଟାମିନ 'ବି '

       ଖାଇଲେ ହୁଅଇ ସୁସ୍ଥ ll 6