ଚକ୍ଷୁ
ଚକ୍ଷୁ
ମୁଖ ନିସୃତଃ କବି – ସନ୍ଥ କବୀର ଦାସ
ଅନୁବାଦ - ଡଃ ସୁବାସ ଚନ୍ଦ୍ର ରାଉତ
ଆଖି ତଳେ ମୋ କାଳିଆ ଦାଗ, ତୁମ ବାଟକୁ ନିରେଖି,
ଜିଭରେ ମୋର ଫୋଟକା ହେଲା, ନାମ ତୁମ ଡାକି ଡାକି ।
ବିରହ କଷ୍ଟେ ବୈରାଗୀ ଆଖି, ଦିଶେ କମଣ୍ଡଳୁ ସମ,
ମାଗୁଛି ତୋର ଦର୍ଶନ ଚକ୍ଷୁ ଖୋଲା ଦିବା ରାତ୍ରୀ ମମ ।
ସବୁ ରାଗରେ ବାଜୁଛି ବାଜା, ବିରହ ସଙ୍ଗୀତ ନିତ୍ୟ,
ଆଉ କେହି ବି ଶୁଣି ପାରେନି, ତୁମର ଇଚ୍ଛା ବ୍ୟତୀତ ।
ମଙ୍ଗଳ ଗୀତ ଆନନ୍ଦ ମନେ, ଗାଇବା ଆସ ସଜନୀ,
ଶୁଭ ପ୍ରଭାତ ସୁସମାଗତ, ବିତିଲା ଗତ ରଜନୀ ।
ସବୁ ସ୍ଥାନରେ ସଦା ପୁଷ୍ପିତ, ପୁଷ୍ପ ବଗିଚାରେ ମୋର,
ସଦା ସର୍ବଦା ମାନସ କରେ, ରକ୍ଷଣାବେକ୍ଷଣ ତାର ।
ନାମ ବର୍ଷାରେ ସଦା ଅମୃତ, ଫଳ ଫଳେ ଚାରିଦିଗେ,
ପାନ କରିବେ ରସ ତାହାର, କୌଣସି ସନ୍ଥ ସୌଭାଗ୍ୟେ ।
କବୀର କହେ ସଦ୍ଗୁରୁ ଶବ୍ଦ ତାତ୍ପର୍ଯ୍ୟ କହି ହେବନି,
ମଙ୍ଗଳ ଗୀତ ଆନନ୍ଦ ମନେ, ଗାଇବା ଆସ ସଜନୀ ।