ଚିତଉ ଉଆଁସ

ଚିତଉ ଉଆଁସ

  

ଅନିରୁଦ୍ଧ କୁଣ୍ତ

*******************************

 ଧରଣୀ ଗଭାରେ   କାଶତଣ୍ତି ଫୁଲ 

     ଦେହେ ତାର ସବୁଜ ଶାଢୀ

ଶ୍ରାବଣ ମାସର     ଚିତଉ ଉଆଁସ 

     ଚିତଉ ତାକୁ ଦିଅ ବାଢି ।

କୃଷକ ବାପୁଡ଼ା   ହେଲାଣି ଆତୁର

    କରିବ ମାଟି ମା ପୁଜନ

ଅାଶିଷେ ତାହାର  ସୁନାର ଫସଲେ

    ହରି ନବ ସବୁରି ମନ ।

 ଅରୁଆ ଚାଉଳ ନଢିଆର ଆଣ

    କାଠ ଚୁଲି ମାଟିପଲମ

ଧୋବ ଫରଫର ଚିତଉ ପିଠାଟା

   ଲାଗଇ ଯେ ଭାରି ନରମ ।

ଓଡିଆ ଜାତିର   କହେ ଇତିହାସ

 ଜୀବେ ଦୟା ତାର ବିଶ୍ବାସ

ଚିତଉ ପିଠାଟା  ଗେଣ୍ତାକୁ ଖୁଆଇ

   ଆନଦେ ମାରିବ ନିଶ୍ବାସ ।

ସ୍ନାନ ପୂର୍ଣ୍ଣମୀକୁ  ବାହୁଡା ଯାତ ବି

   କେବେ ଠାରୁ ତ ଗଲାଣି

ଅଜିର ଦିବସେ ତିନି ଠାକୁର ମୋ

   ଚିତାଲାଗି ହୋଇବେ ପୁଣି ।

ଦଇତା ପତି ଯେ  ଗୁପତ ସେବାକୁ

   ତାହାର ଅଣ୍ଟା ଭିଡିଲାଣି

ସୋଲର ଚିତାକୁ   ଲଲାଟୁ ଓଲାଗି

   ସଜାଇବ ମଉଡମଣି ।

ମାଣିକର ଲାଲ ଚିତାଲାଗି ହେବେ

  ଫୁଲେଇ ସୁଭଦ୍ରା ଭଉଣୀ

ଜଗାର ଲଲାଟେ ଧଳାହିରା ଚିତା

   ବଳିଆ ନିଳ ନୀଳା ପୁଣି ।

ସର୍ବପାପ କ୍ଷୟ  ହୋଇବ ଲୋ ଆଜି

    କରିଲେ ଜଗା ଦରଶନ

କହୁ ନାହିଁ ମୁହିଁ     ନିଜ ମନୁ କିଛି

    କହେ ଏହା ପଦ୍ମ ପୁରାଣ ।