ଚିଠି

ଠିକ୍ ସମିଆଁ ଥି କାଗଜ୍ ନାଇଁ ମିଲ୍'ଲା

ପତର୍ ଥି ଚିଠି ଲେଖିଛେ,

ହର୍'ବର୍ତର୍'ବର୍ ଗେରେଇ କରି

ଆଇ ଲବ ୟୁ କହୁଛେ l

କହୁଛେ ଯେତେ ମୋର୍ ମନର୍ କଥା

ଦେଖ୍'ଲା ଦିନୁ ତମ୍'କେ,

ଆଖିଥି ତମେ ପେରେମ୍ ସର୍ ମାରି

ଢୁକି ଗଲ ହୁରୁଦ୍'କେ ।

ହୁରୁଦ୍'କେ ମୋର୍ ଦୁଲ୍'କେଇ ଦେଲା

ତମର୍ ଚାଖି ଚାହାନୀ,

ଏନ୍ତା ଢଙ୍ଗେ ସଜେଇ ହେଇଥିଲ ଯେ

ମନ୍' ନେଇଗଲ ଘିନି ।

ଘିନି ନିଅ ସବୁ ଦିନ୍'କର୍ ଲାଗି

ହେଇ ତମେ ଦୁକାନି,

କଳା ଟିକେ ବାଗିର୍ ଚେହେରା ଅଛେ

ନାଇଁ ଦେବ ନ ବାଉନି ।

ବାଉନି ଦେଲେ କାଏଁ କରି ପାର୍'ମି

ନିଜେ ପସ୍'ତେଇ ହେମି,

ଅମିରି ଗଛେ ଉଚ୍'କି ହେଇକରି

ଜୀବନ୍ ହାରି ଦେମି ।

ଦେମି ତମ୍'କେ ଯାହା ମାଗ୍'ବା ମତେ

କିଛି ଉନା ନାଇଁ କରେ,

ଉଲେ,ଦୁଲେ ରଖିଥିମି ସବୁଦିନ

ପଡିଥିଲେ ଭି ଜରେ ।

ଜର୍ ଆନୁଥିଲେ ନିଜେ ରାନ୍ଧିକରି

ଖୁରି ଗିନା ମାଜ୍'ମି ଯେତେ,

ଭଲ୍ ପାଉଛ କି ନାଇଁ ଯେ ଚିଠିର୍ ଉତ୍ତର

 ଫେରାବ ଜଲ୍'ଦି ମତେ ।

ମତେ କାଗଜ୍ ଥି ଲେଖି ଚିଠି ଦେବ

ତମର୍ ମନର୍ କଥାକେ,

ଦୁଇ,ତିନ୍'ଦିନ୍ ସମିଆଁ ପଛେ ଲାଗୁ

ଟାକି ଥିମି ତମର୍ ଜବାବ୍'କେ ।