ଚିହ୍ନା ଯନ୍ତ୍ରଣା
ଚିହ୍ନା ଯନ୍ତ୍ରଣା
ଅଶୁଦ୍ଧ, ଅପବିତ୍ର, ଅଛୁଆଁ
ଏମିତି ଅନେକ 'ଅ' ର
ପୁନରାବୃତ୍ତିର କଟାକ୍ଷ ସହିଛି !
ଦେଖ ! ଏ ଯନ୍ତ୍ରଣା !
ଦେଖ ଜୀବନ ପ୍ରକ୍ରିୟାରେ
ପୁଣି ସେ 'ଚିହ୍ନା ଯନ୍ତ୍ରଣା' ଲେଉଟି ଆସିଛି ।।
ଅସ୍ପଷ୍ଟ ଶବ୍ଦରେ ମୁଁ ନିଜକୁ ବୁଝେ ଦେଇଛି
ଅପ୍ରୀତିକର ଅବସ୍ଥାକୁ ଲୁଚେଇ ଦେଇଛି
ଅଦୃଶ୍ୟ ଶିକୁଳି ବାନ୍ଧି ମୁଁ ନେଇଛି
କୋହକୁ ସାଇତି ଲୁହକୁ ପିଇଛି
କାରଣ ! ........ କାରଣ,
ଏମିତି କରିବାକୁ ମା' ଶିଖେଇଛି
ସବୁ କିଛି ସହିବାକୁ
ଚୁପ୍ ରହିବାକୁ
ନାରୀ ଧର୍ମ ବୋଲି
ସେ ମତେ କହିଛି,
ଦେଖ ! ଜୀବନ ପ୍ରକ୍ରିୟାରେ
ପୁଣି ସେ 'ଚିହ୍ନା ଯନ୍ତ୍ରଣା' ଲେଉଟି ଆସିଛି ।।
ଏ ପ୍ରକ୍ରିୟା ତ ପ୍ରକୃତି ସମ୍ଭୁତ
ଯନ୍ତ୍ରଣାର ଜର୍ଜରେ କେତେ ମୁଁ ଦଗ୍ଧୀଭୂତ
ତେବେ କୁହ ?
କାହିଁକି କରିଛ ସବୁଠୁ ଅତୀତ(ଦୂର)
କି ପାଇଁ ସାଜିଛି ବିନା ପାପରେ ପତିତ ।।
ପୂଜା_ଅର୍ଚ୍ଚନା,
ରୋଷେଇ ଘରକୁ ମନା
ତୁଳସୀ ଚଉରା, ଘର ଅଗଣା
ସବୁ ପବିତ୍ର ସ୍ଥାନକୁ ଯିବାକୁ ମନା,
ଚାରି କାନ୍ଥ ଆଉ ଅନ୍ଧକାର କୋଠରୀ
ଛଟପଟ ହୁଏ ମୁଁ ଭାଗ୍ୟକୁ ଆଦରି
ଅପମାନିତ, ଅପବିତ୍ର , ଅଛୁଆଁ ନୁହେଁ
ମୁଁ ଜନନୀ ଭଗିନୀ ଜାୟା,
ମୁଁ ଯେ ନାରୀ
ଜଠେ ଯନ୍ତ୍ରଣା ଧରି
ନବ୍ୟ ଜୀବନର ମୁଁ ସ୍ରଷ୍ଟାକାରି
ତେବେ ଯନ୍ତ୍ରଣାରେ କିଆଁ
ସମାଜ ମୋ ବଇରୀ
ଅପମାନିତ, ଅପବିତ୍ର , ଅଛୁଆଁ ନୁହେଁ
ମୁଁ ଜନନୀ ଭଗିନୀ ଜାୟା,
ମୁଁ ଯେ ନାରୀ
ଜଠେ ଯନ୍ତ୍ରଣା ଧରି
ନବ୍ୟ ଜୀବନର ମୁଁ ସ୍ରଷ୍ଟାକାରି ।।