ଛୋଟ ଛୋଟ କଥା

କଳିଆରେ !!!

ଭାରି ଇଚ୍ଛା ମୋର

ତୋ ସାଥେ ଗଢ଼ନ୍ତି

ଭାବର ସଂସାର ,

ଯେପରି ଦେଖନ୍ତି

ସଭିଏଁ ତୋତେରେ

ସେମିତି ଦେଖିବି  ବୋଲି

ଚାହେଁ ତୋ ମୁହଁକୁ ବାରବାର ।

ତୋ ଆଖିରେ ଯଦି

ସୂର୍ଯ୍ୟ ଆଉ ଚନ୍ଦ୍ର

ରହିଛନ୍ତି ବନ୍ଧା ପଡି ,

କରି ଦିଅନ୍ତୁନି

ଜ୍ୟୋତିଷ୍ମାନ ମତେ

ସୂକ୍ଷ୍ମ ଅନୁଭୂତି ସବୁ

ପାରନ୍ତି ପଢି ।

କେଡେ ଆଶା ମୋର

ତୋର ଦିବ୍ୟ ସ୍ପର୍ଶ

ପାରନ୍ତି ମୁଁ ଅନୁଭବି ,

ଘୁଞ୍ଚି ଯାଆନ୍ତା ସକଳ ଦୁଃଖ

ଅବସାଦ ଯେତେ

ପାଆନ୍ତି ଅମୃତ ଉପଲବ୍ଧି ।

ମୋ ମଥାରେ ପାଆନ୍ତି

ତୋ ଅଦୃଶ୍ୟ ହସ୍ତରୁ

ଆଶ୍ୱାସ ଭରା ଛୁଆଁ ,

ମୋ କପାଳରେ ତୁ

ଲେଖିଦିଅନ୍ତୁ

ବଞ୍ଚିବାର ଆଶା ନୂଆ ।

ମୋ ଓଠରେ ଦିଅନ୍ତୁ

ତୋ  ଜବା ଅଧର

ମଧୁଭରା ମଧୁର ହସ ,

ମଧୁମକ୍ଷୀ ପରି ମଧୁ ବିତରନ୍ତି

ହରିଯାଆନ୍ତି କାହାର କ୍ଳେଶ !

କଅଁଳ କଦଳୀ ପତ୍ର

ପଣତ କାନି ମୋ

ଭରି ଦିଅନ୍ତୁ -

ଶବ୍ଦ ଫୁଲରେ ସମ୍ଭାର ରେ ,

ଝରାଫୁଲ ପରି

କବିତା ସବୁ ମୋ

ଝରି ପଡ଼ନ୍ତା  ତୋ

ଅଦୃଶ୍ୟ ପଦ ତଳେ ।