ଛାଡଖାଇ

ମାସ ଯାକ ଧର୍ମ   ପାଳିଲେ ବହୁତ

   ଏକା ଦିନେ ପାପ ଅର୍ଜିବେ

ମାଛ ଛେଳି ଆଉ   କୁକୁଡା ମାନଙ୍କୁ

   ମାରି ସର୍ବେ ଆଜି ଗିଳିବେ ।

ମାଛ କହେ ଜଳେ ଆହେ ନାରାୟଣ 

   ଏ କେମିତିକା ଯେ ବିଚାର

ପଶୁ ଠାରୁ ହୀନ   ପାଲଟି ଯାଇଛି

     ମଣିଷ ମାନଙ୍କ ଆଚାର ।

ଛେଳି କହେ ପୁଣି   କୁକୁଡାକୁ ଚାହିଁ

    ନାମକୁ ଯେ ଧର୍ମ ପାଳନ୍ତି

ଏକା ଦିନେ ଶହ ଶହ ପ୍ରଣୀଙ୍କର

    ବଅଁଶ ସେମାନେ ବୁଡାନ୍ତି ।

ଧରମ ନାମରେ    ରକ୍ତାତ କରନ୍ତି

    ଧରଣୀ ମାଆର ଛାତିକୁ

ଅବିବେକ ଆଜି   ମଣିଷ ସମାଜ

    ଗଲାଣିତ ରସାତଳକୁ ।

ଯାହା ହେବା କଥା ହେବ ଲୋ କୁକୁଡା

    ମନ ଦୁଃଖ କାହିଁ କରୁଛୁ

ସ୍ବାର୍ଥପର ଏଇ    ମଣିଷ ଗୁଡାକୁ

    ନିଜ ଗୁଣେ କ୍ଷମା କରୁଛୁ ।

ଛାଡ ଖାଇ ଅର୍ଥ  ଅଲଗା ଯେ ସବୁ

   ସେମାନେ କାହୁଁବା ବୁଝିବେ

ଜାଣ ଅଜାଣନ୍ତେ  ଆଜି ସେଇ ମାନେ

    ଲକ୍ଷେଜନ୍ମ ପାପ ଅର୍ଜିବେ ।