ଚାବି ହଜିଛି

ହୁରି ପଡିଛି,

ଚାବି ହଜିଛି, 

କୁଞ୍ଚ କାନିରେ ବାନ୍ଧି ରଖିଥିଲି ମୋ

ସବୁ ଆଶା, ସ୍ଵପ୍ନର ସ୍ମୃତିମାନଙ୍କୁ ପୁଟୁଳା କରି

ସାଇତି ଥିଲି ଯା' ଭାନୁମତୀର ପେଡିରେ |

ଖୋଜିଲି, ବହୁତ ଖୋଜିଲି

ସାତ ତଳ ପଙ୍କରେ ପୋତା

ସିନ୍ଧୁକରେ ବନ୍ଦ 

ଫରୁଆ ଭିତରେ |

ଆଉ ନିଧି ବୁଢାର ଚାରିପୁଅମାନେ

ଖୋଳିଥିବା ବାରିପଟ ବଗିଚା ମାଟିରେ, 

କାଳେ ଗୁପ୍ତଧନ ସହ ପୋତି ହେଇ ଯାଇଥିବ !

କଲୁରିବେଣ୍ଟର ବୁଢୀ ପରି ଏଠି ଅଛି, ସେଠି ଅଛିର

ଖୋଜାରେ ବାଟବଣା ହେଉଛି ଯାହା |

ଅଥଚ, ଖୋଜିଲିନି ତା'କୁ ମୋ 

ମନ ଗହନରେ, ବିବେକରେ, ବୁଦ୍ଧିରେ, 

ମୋ ପାରିଲା ଓ ନିପାରିଲା ପଣର ଛାଞ୍ଚରେ |

ବେଢେଇ ରହିଛି ସେ ସର୍ବଦା ମୋ ଇଛିବା ପଣରେ

କସ୍ତୁରୀ ମୃଗର ନାଭିରେ ଥିବା କସ୍ତୁରୀ ପରି,

ଅଥଚ, ଠିକଣାଟା ଯା' ମୁଁ ବେଳେ ବେଳେ ଯାଉଛି ପାସୋରି |