ବର୍ଷା
ବର୍ଷା
ବର୍ଷା ଆସିଛି :
ମୋ ପ୍ରିୟାର ଆଖିର ପଲକରେ
ନୁପୁର ଝଲକରେ
ସ୍ମୃତିର ସରରେ
ସିନ୍ଦୂରା ସକାଳରେ
ଗୋଧୂଳିର ଗୋଲାପୀ ସଞ୍ଜରେ
ଏକ ମାୟାବିନୀ ରାତ୍ରିର ମାର୍ମିକ ରାଗିଣୀରେ
ବର୍ଷା ଆସେ :
ପଥକ୍ଲାନ୍ତ ଶ୍ରମିକର ପ୍ରଶାନ୍ତିର ପ୍ରଲେପରେ ।
ସାଧବବୋହୂର ଅପରୂପ ରୂପର ପୋଷଣୀରେ
ଚାଷୀକୁଳଙ୍କ ନବସଂଜୀବନୀରେ
ସର୍ବତ୍ର ପରିବ୍ୟାପ୍ତ ଏକ ସୁରଭିତ ପ୍ରାଣଶକ୍ତିରେ
ବର୍ଷା ଆସିଛି :
ପର୍ଯ୍ୟାୟପତିତ କଙ୍କାଳର ନବ କଳେବରରେ
ପ୍ରଦୂଷିତ ରାଜନୀତିର ବିଷବଳୟରେ
ବିପର୍ଯ୍ୟସ୍ତ ପ୍ରଶାସନର ସମ୍ବେଦନହୀନ ପ୍ରତିକ୍ରିୟା
ବର୍ଷା ଆସେ :
ଯୁଗ ନିର୍ମାଣର – ଅଭ୍ୟୁଦୟର ଏକ ନୂତନ ଆଭିମୁଖ୍ୟରେ
ସୁଜଳା ସୁଫଳା ଶସ୍ୟଶ୍ୟାମଳା ଧରିତ୍ରୀର
ଆତ୍ମିକ ଆଲୋଡନରେ
ପରିପୃଷ୍ଟ ପରିବେଶରେ – ଭାବର ପ୍ରାଚୁର୍ଯ୍ୟରେ
ବର୍ଷା ଆସିଛି : ଆତଙ୍କର ଆସ୍ତରଣରେ - ଦୁର୍ଘଟଣାର ପ୍ରାବଲ୍ୟରେ
କ୍ରମବର୍ଦ୍ଧିଷ୍ଣୁ ଗଣଦୁଷ୍କର୍ମରେ – ପୁନଃପୌନିକ ଜାଲିଆତିରେ
ନିଶାଖୋର ଯୁବ ପୀଢିର ଆତ୍ମ ସମର୍ପଣରେ – ଭଙ୍ଗା ଆଇନାରେ
ବର୍ଷା ଆସିବ : ଉନ୍ନୟନର ସୁପରିକଳ୍ପିତ ଯୋଜନାରେ
ଐକାନ୍ତିକ କ୍ରିୟାନ୍ୱୟନରେ
ଦୁର୍ନୀତିର ଦୂରୀକରଣରେ - ସୁଦୃଦ ନିଶା ନିବାରଣରେ
ମହଙ୍ଗା ବୋଝରେ - ବର୍ଦ୍ଧିତ ଆୟରେ
ସ୍ଵାଧୀନତାର ସପ୍ତପ୍ରହରୀର ସୁନେଲି ସପନରେ ।