ବର୍ଷା

ବର୍ଷା ଆସିଛି:

ରୌଦ୍ରତପ୍ତ ଧରାବକ୍ଷରେ ଆଶ୍ଵସ୍ତିର ସଂଦେଶ

ବିକ୍ଷୁକ୍ତ ମାନସିକତାରେ ଶାନ୍ତିର ପ୍ରଲେପ ଦେଇ

କାଗଜଡଙ୍ଗା ଓ ସାଧବ ବୋହୁର ଲୁଚକାଳି

ଖେଳ ଡେଇଁ ।

ବର୍ଷା ଆସିଲା:

ମହାବାତ୍ୟା, ଭୂକମ୍ପ ଓ ମହାମରୁଡିର ପ୍ରଲମ୍ବିତ

ପୃଷ୍ଠଭୂମିରେ

ସୁବିଧାବାଦୀ ରାଜନୀତିର ସମ୍ଭାବ୍ୟ ପଟ୍ଟ

ପରିବର୍ତ୍ତନରେ

ତତଲାଗଡ଼ ରାଜରାସ୍ତାରେ ହା-ପାଣି

ଆର୍ତ୍ତନାଦରେ ।

ବର୍ଷା ଆସିଥାଏ:

ପ୍ରାଚୁର୍ଯ୍ୟ ଓ ପରାଭବର ଶାନ୍ତିପୂର୍ଣ୍ଣ

ସହାବସ୍ଥାନରେ

ସ୍ତୁପୀକୃତ ଅଳନ୍ଧୁର ପ୍ରସ୍ତାବିତ ନିଷ୍କାସନରେ

ବିଦଗ୍ଧ ପ୍ରେମିକର ବେମୁରା ରାଗିଣୀରେ ।

ବର୍ଷା ଆସିବ:

ପରମ୍ପରା ଓ ପ୍ରଥା ବିହୀନ ଚଳଣିର

ପରିପୁଷ୍ଟତାରେ

ପ୍ରଲୁବ୍ଧ ପଡ଼ଙ୍ଗର ପ୍ରିୟାର ପଣତରେ

ରାତିସାରା ଖରା ଓ ଦିନତମାମ ତାରା ଗଣିବାର

ଅଜବ ଖିଆଲରେ ।