ବର୍ଷା ଲୋ,ତୁ ଆସିଗଲୁ

ବର୍ଷା ଲୋ,ତୁ ଆସିଗଲୁ

ଅଲଣା ଓଢଣୀ ନେଇ

ନାଚି ନାଚି ଝୁମି ଝୁମି

ବେସୁରା ସୁରରେ ।

ଭାବି ନ ଥିଲି ମୁଁ ସତେ

ଭେଟ ହେବ ତୋ'ରି ସାଥେ

ପଉଷ କାକର ଘେରା

ବେପଥୁ ବେଳାରେ ।

ଆସିଲୁ ତୁ ଭଲ କଲୁ

ନିଜେ ଭିଜି, ଭିଜେଇଲୁ

ଅଜାଣତେ ମୁହଁ ତୋ'ର

ଯାଇଥିଲା ଶୁଖି ।

କାହିଁକି ଲୋ ବର୍ଷା ରାଣୀ

ସାଥିରେ ତୋ'ସଉତୁଣୀ

ଶୀତ କୁ ସାଥିରେ ଆଣି।

ଓଦା କଲୁ ଆଖି ।

ଶ୍ରାବଣରେ ଆସୁଥିଲୁ

ନୁପୁର ତୁ ନାଇଥିଲୁ

ଇନ୍ଦ୍ରଧନୁ ଓଢଣୀରେ

ନିଜକୁ ସଜେଇ ।

ଓଢଣୀ ତୋ' ଉଡୁଥିଲା

ଫୁଲର ମହକ ଥିଲା

ମେଘରେ ମେଘରେ ସାରା

ଆକାଶ ରଙ୍ଗେଇ ।

ନିରୀମାଖୀ ନୃତ୍ୟାଙ୍ଗନା

ସାଧବ ବୋହୁ ଗହଣା

ଆଭୂଷଣେ ସାଜିଥିଲୁ

ପ୍ରତୀକ୍ଷା ମାନସୀ ।

ଆଜି ଏଇ ଅବେଳାରେ

ବରଷିଲୁ ଅଗଣାରେ

ଦେଇ ପାରିଲୁନି ଟିକେ

କା'ମନରେ ଖୁସି ।

ଯା'ଲୋ ବରଷା ରାଣୀ

ସାଥେ ନେଇ ସଉତୁଣୀ,

ଗେଲ୍ହେଇ ସାଜି ଆସିବୁ

ଶ୍ରାବଣୀ ସାଥିରେ ।

ସ୍ୱାଗତିକାର ସମ୍ଭାର

ଛନ୍ଦ ଭରା ଉପହାର

ସାଇତି ସଜେଇ ଥିବି

ପ୍ରୀତିରେ ପ୍ରୀତିରେ ।