ବର୍ଷା ଅନୁଭୂତି

ଟପ ଟପ ବର୍ଷା ଆସିଲା ସହସା

  ବହିଲା ପଵନ ଖରେ

ମୁହଁ ସଞ୍ଜବେଳେ ଫେରୁଥିଲି ଘରେ

  ରହିଲି ଅଧା ବାଟରେ |

ନାହିଁ ତହିଁ ରାହା ଭଙ୍ଗା ସ୍କୁଲ ସାହା

  ସାଇକେଲ ସହିତରେ 

ଧାଇଁ ତରତରେ ଓଦା ସରସରେ 

  ଚଢ଼ିଲି ବାରଣ୍ଡା ପରେ |

ସବୁ ପ୍ରକୋଷ୍ଠରେ ପଡ଼ିଅଛି ତାଲା

  ଘୋଡ଼ିହୋଇ ତଉଲିଆ

କରମ ଆଦରି ଜାକିଜୁକି ହୋଇ

  ସେହିଠାରେ ହେଲି ଠିଆ |

ବାରଣ୍ଡା ସାରା ତ ଭଙ୍ଗା ଆଜବେଷ୍ଟସ

  ତହିଁରୁ ଗଳୁଛି ପାଣି

ମାରୁଛି ଛିଞ୍ଚଡ଼ା ତିନ୍ତୁଛି କପଡା

  କପାଳ ଫାଟିଲା ଜାଣି |

ବଢ଼େ ବେଳୁବେଳ ବରଷା ପଵନ 

  ବିଜୁଳିକୁ ଘଡ଼ଘଡ଼ି

ଘୋଟିଲା ଅନ୍ଧାର ମାଡିଆସେ ଡର

  ଭୂତ ଭୟ ଗଲା ବଢ଼ି |

ସଞ୍ଜୁଆ ମଶାଙ୍କ କାମୁଡା ଆତଙ୍କ

  ମାଛିଙ୍କର ଉପଦ୍ରବ

ଓଦା ବସନକୁ କାଲୁଆ ପଵନ

  ଥରାଇଲା ଅଵୟଵ |

 ଏତିକି ବେଳରେ ପବନ ଝଙ୍କାରେ

  ଝରକାଟେ ଗଲା ଖୋଲି

ଅଜଣା ଭୟରେ ଶିହରି ଉଠିଲି

  ମୁଖେ ରାମ ରାମ ବୋଲି |

ଝରକା ଫାଙ୍କରେ ସୁ ସୁ ଗର୍ଜନ

 ସତେକିଭୂତ ବାହିନୀ

ମାଡ଼ି କି ଆସନ୍ତି ଏହି କଥା ଚିନ୍ତି

  ଭୟରେ ପିଳେହିପାଣି |

ଏକାଗ୍ର ଚିତ୍ତରେ ଯୋଡ଼ି ଯୁଗ୍ମ କରେ

  ସ୍ମରିଲି ଜଗତନାଥ

ସହସା ଥମିଲା ପବନ ବରଷା

  ଲଭିଲି ମନେ ଆଶ୍ୱସ୍ତ |

ରାତି ଆଠଟାରେ ପହଞ୍ଚିଲି ଘରେ

  ମନେ ପଡ଼ିଲେ ସେ ସ୍ମୃତି

ଟାଙ୍କୁରଇ ଲୋମ ବହିଆସେ ଘର୍ମ

 ଅଭୁଲା ସେ ଅନୁଭୂତି |