ବରଷା ଆସେ
ବରଷା ଆସେ
ବରଷା ଆସେ ଲୋ ବରଷା ଆସେ
ଗିରିଷମ ଶେଷେ ଆଷାଢ଼ ମାସେ
ଘୋଟଇ ବାଦଲ ଆକାଶ ଦେଶେ
ଟପ ଟପ ଟପ ଜଳ ବରଷେ ।
ଘଡଘଡି ନାଦେ କମ୍ପଇ ମହୀ
ଚକ ଚକ ମାରି ବିଜୁଳି ହସେ
ସପତ ରଙ୍ଗର ଇନ୍ଦରଧନୁ
ରୂପକୁ ସଜେଇ ସୁନ୍ଦର ଦିଶେ ।
ସାରୁଗଛ ମୂଳେ ବେଙ୍ଗୁଲି ରାଣୀ
କଟର କଟର ଶବଦ ଘୋଷେ
ନାଲି ଗୁଲୁ ଗୁଲୁ ସାଧବ ବୋହୂ
ଧୀରେ ଧୀରେ ଚାଲେ ସବୁଜ ଘାସେ ।
ଭାଙ୍ଗେ ଘରଦ୍ୱାର,ଗଛ ପତର
କେତେ ବିଲବାଡ଼ି ଝଡ଼ ବତାସେ
କାଦୁଅରେ ପୁରି ଦାଣ୍ଡ ଗୋହିରୀ
ଚଲାଚଲି ବାଟେ ଗୋଡଟି ଖସେ ।
ନାନା ଜାତି ପକ୍ଷୀ ଦଳକୁ ଦଳ
ଉଡ଼ି ବୁଲୁଥାନ୍ତି ମନ ହରଷେ
ଚାଷୀ ଭାଇ ମନ ଆନନ୍ଦେ ନାଚେ
ଲଙ୍ଗଳ ମୁନରେ ବିଲକୁ ଚଷେ ।
ଚମ୍ପା,କନିଅର,ଗେଣ୍ଡୁ,ଟଗର
ସୂର୍ଯ୍ୟମୁଖୀ,ମଲ୍ଲୀ ଫୁଲ ସୁବାସେ
ଉଡ଼ିବୁଲେ ନିତି ପରାଜାପତି
ଅତି ସରାଗରେ ମଧୁକୁ ଶୋଷେ ।
ଜଗତର ନାଥ ଶ୍ରୀ ଜଗନ୍ନାଥ
ରଥରେ ପତିତପାବନ ବେଶେ
ଭାଇ ଭଉଣୀର ସାଥିରେ ବସି
ବାନ୍ଧି ପକାଇବେ ସେନେହ ପାଶେ ।