ବନ୍ଦେ ଉତ୍କଳ ମାତା
ବନ୍ଦେ ଉତ୍କଳ ମାତା
ଶ୍ରୀଚରଣେ ଯା'ର ନୀଳ ପାରାବାର
ନିତି ପିଟୁ ଅଛି ମଥା
ପାହାଡି ଝରଣା କୁଳୁ କୁଳୁ ନାଦେ
କହୁଛି ମଧୁର କଥା
ସେଇ ମୋ ଜନନୀ ବୀର ପ୍ରସବିନୀ
ବନ୍ଦେ ଉତ୍କଳ ମାତା l
ଯେଉଁଠି ଜନମି ମଧୁ ଗୋପବନ୍ଧୁ ରଚିଗଲେ ଇତିହାସ
ଓଡ଼ିଆ ଜାତିର ରଖିବାକୁ ମାନ
ବାଢ଼ି ଥିଲେ ଅଭିଳାଷ
ଗାଇ ଗୌରବର ଗାଥା
ସେଇ ମୋ ଜନନୀ ବୀର ପ୍ରସବିନୀ
ବନ୍ଦେ ଉତ୍କଳ ମାତା l
ସୂରୁଜ ଉଇଁଲେ ହସିଉଠେ ଯାର
ନଦନଦୀ ଗିରି ବନ
କମ୍ପି ଉଠେ ଯହିଁ ନିସ୍ତବ୍ଧତା ଭେଦି
କୋଇଲିର କୁହୁ ତାନ
ନଇଁ ଯାଏ ମୋର ମଥା
ସେଇ ମୋ ଜନନୀ ବୀର ପ୍ରସବିନୀ
ବନ୍ଦେ ଉତ୍କଳ ମାତା l
ଜଗନ୍ନାଥ ଯା'ର ଆରାଧ୍ୟ ଦେବତା
ଗୀତା ଭାଗବତ ପୁରାଣର କଥା
ପଖାଳ କଂସାର ଆକର୍ଷଣ ଯାର
ଦେଉଛି ମଧୁର ବାର୍ତ୍ତା
ସେଇ ମୋ ଜନନୀ ବୀର ପ୍ରସବିନୀ
ବନ୍ଦେ ଉତ୍କଳ ମାତା l
ଯେଉଁଠି ବି ଥିଲେ ଯେମିତି ବି ଥିଲେ
ନ ଭୁଲିବୁ ତା ମମତା
ଜାତିକୁ ଆମର ଦେଇ ସନମାନ
କହିବା ଓଡ଼ିଆ କଥା
ସେଇ ମୋ ଜନନୀ ବୀର ପ୍ରସବିନୀ
ବନ୍ଦେ ଉତ୍କଳ ମାତା l