ବକ ପଂଚକ

ଆ କା ମା ବୈ ଆମ ଧର୍ମ ମାସ ଚାରି

କାର୍ତ୍ତିକ ମାସଟି ତହିଁ ମଧ୍ୟେ ଅଟେ ଭାରି ।

ଶୈବ ବୈଷ୍ଣବ ଜନଂକ ମାସ ଅତି ପୁଣ୍ୟ  

ପ୍ରାତରୁ ସ୍ନାହାନ ଦେବାଳୟରେ ଭଜନ ।

କାର୍ତ୍ତିକ ମାହାତ୍ମ୍ଯ ବିଷ୍ଣୁ ଶହସ୍ର ନାମରେ

ଭାଗବତ ପାଠ କାହିଁ ପୁରାଣ ପାଠରେ ।

ଶୁକ୍ଳ ପକ୍ଷ ଶେଷ ପାଞ୍ଚ ଦିନଟି ପଞ୍ଚକ

ବକ ପଞ୍ଚକ ନାମରେ ପ୍ରସିଦ୍ଧ ସେ ଅଙ୍କ ।

ବିଶେଷ ପ୍ରସ୍ତୁତି ନିରାମିଶ ଭକ୍ଷଣର 

ବିନା ପିଆଜ ରସୁଣ ସାତ୍ତ୍ଵିକ ଆହାର ।

ମନ୍ଦିରେ ମନ୍ଦିରେ ଚାଲେ ପ୍ରସାଦ ବଣ୍ଟନ 

ପୁଣ୍ୟ ପ୍ରାପ୍ତି ଲାଗି ହୁଏ ଅନ୍ନ ବସ୍ତ୍ର ଦାନ ।

ହବିଷ୍ୟାଳି ଡାଲମାରେ ସାରୁ ମୁଗ ଜାଇ

କଦଳୀ କଖାରୁ ସଂଗେ ଖମ୍ବ ଆଳୁ ଥୋଇ ।

ତ୍ରୟୋଦଶୀ ଶିବ ମନ୍ଦିରରେ ବଡ ଓଷା

ଚତୁର୍ଦ୍ଦଶୀ ଦେଶ ପାଳେ ଶିବଂକ ଭରଷା ।

ପୂର୍ଣ୍ଣମୀ ପ୍ରାତରୁ ନୌ ବାଣିଜ୍ୟ ଉତ୍କଳର

କାଗଜ ଡଙ୍ଗା ଭସାଇ ଅସ୍ମିତାକୁ ସ୍ମର ।

ଜାଭା ସୁମାତ୍ରା ବାଲିକୁ ମେଲାଇ ଅଝାଲ

ପୂର୍ବଜ ଆମର କରୁଥିଲେ ଅନୁକୁଳ ।

କଟକର ବାଲିଯାତ୍ରା ମହାନ ସଂସ୍କୃତି 

ରାଜ୍ୟ ମହୋତ୍ସବ ସମ୍ମାନରେ ସ୍ମରେ ଜାତି ।

ମହାନଦୀ ବାରବାଟୀ ଦୁର୍ଗ ବାଲିଯାତ୍ରା 

ତ୍ରିକୋଣୀୟ ଗଉରବ ଗାଥା ମହାଯାତ୍ରା । 

ପଞ୍ଚ ଦେବ ପଞ୍ଚନ୍ଦ୍ରିୟ ପଞ୍ଚଭୂତ ପରି 

ପଞ୍ଚକ ପାଳିବା ଆମେ ଅସ୍ମିତା ସୁମରି ।