ବିଶ୍ୱ ଭାରତୀ ଭୂସ୍ବର୍ଗ
ବିଶ୍ୱ ଭାରତୀ ଭୂସ୍ବର୍ଗ
ବାର ମାସେ ତେର ପରବ ବଉଳ
ଓଡିଶା ଆମ ଗରବ ।
ଗରବ ନୁହେଁ ଲୋ ସ୍ବର୍ଣ୍ଣାଭ ସଂସ୍କୃତି
ଐତିହ୍ୟ ଭରା ପରବ ।।
ଜଗତର ନାଥ ପ୍ରଭୁ ଜଗନ୍ନାଥ
ଐତିହ୍ୟର ସ୍ୱୟଂ ସାକ୍ଷୀ ।
ତୀର୍ଥଧାମ ପୁରୀ ଶ୍ରୀକ୍ଷେତ୍ର ଦେଖିଲେ
ଆଖି ରହିଯାଏ ଲାଖି ।।
ମନ୍ଦିରମାଳିନୀ ଭୁବନେଶ୍ୱର ବି
ପରମ୍ପରାରେ ପ୍ରସିଦ୍ଧ ।
ଚାରୁ ଚନ୍ଦ୍ରଭାଗା ଅର୍କ ଶ୍ରୀ କୋଣାର୍କ
ମାଟିର ମହାପ୍ରସାଦ ।।
ପୂର୍ବ ଉପକୂଳ ପଶ୍ଚିମ ଓଡିଶା
ଉତ୍ତର ଅବା ଦକ୍ଷିଣ ।
ପରବେ ଗରବେ ଉଛୁଳି ଉଠଇ
ବରଷ ଯାକ ପାର୍ବଣ ।।
କାର୍ତ୍ତିକ ମାସରେ ପର୍ବ ପଞ୍ଚୁକ ଲୋ
ଲୋକେ କରନ୍ତି ହବିଷ ।
ଧରମ କରମ ଉଭୟ ଉପରେ
ମନେ ପଡେ ଇତିହାସ ।।
ପୂର୍ଣ୍ଣମୀ ତିଥିରେ ଶୁଭ ମୁହୂର୍ତ୍ତରେ
ଓଡ଼ିଆ ବଣିକ ଭାଇ ।
ଦେଶ ବିଦେଶକୁ ବେପାର ପାଇଁକି
ଯାଉଥିଲେ ଦ୍ରବ୍ୟ ନେଇ ।।
ସାଧବ ବୋହୂଙ୍କ ହୁଳହୁଳି ଶବ୍ଦେ
ସମୃଦ୍ଧ ସାଗର ତଟ ।
ମନେ ପଡେ ସେଇ କୀର୍ତ୍ତି ଗଉରବ
ରାଜକୀୟ ସେ ଉଚ୍ଚାଟ ।।
ସାକ୍ଷୀ ଗୋପୀନାଥ ନବମୀ ଲଗ୍ନରେ
ରାଧା ପାଦ ଦରଶନେ ।
ପୁଣ୍ୟ ପ୍ରାପ୍ତି ପାଇଁ ଧାଡି ଧାଡି ହୋଇ
ଲୋକଙ୍କର ଭିଡ଼ ଜମେ ।।
ସତେ ଲୋ ବଉଳ ଆମ ଏ ଉତ୍କଳ
ପର୍ବ ପର୍ବାଣିର ଗର୍ବ ।
ଚିର ସ୍ମରଣୀୟ ଚିର ବନ୍ଦନୀୟ
ବିଶ୍ୱ ଭାରତୀ ଭୂସ୍ବର୍ଗ ।।
ଚନ୍ଦ୍ରଭାଗା ତୀରେ ଏବେ ବି ଶୁଭୁଛି
ପୂର୍ବ ପୁରୁଷ ସଙ୍ଗୀତ ।
ବୋଇତ ବନ୍ଦାଣ ମହା ଉତ୍ସବରେ
ଚଉଦିଗ ମୁଖରିତ ।।
ଆ ଲୋ ବଉଳ ମିଶିକି ଗାଇବା
ଜାତି ସ୍ୱର୍ଣ୍ଣ ଇତିହାସ ।
ଉତ୍କଳୀୟ ଜାତି ଏ ଜାତିର ପ୍ରୀତି
ଆମ ପାଇଁ ନନ୍ଦିଘୋଷ ।।