ବିଲୁଆ ସିଂହ

ସିଂହର ମୁଖାରେ ବିଲୁଆ ଚାତର

ହେବନି ବଣର ରାଜା

ଅଇଁଠା ହାଡ଼ରେ ଲୋଭଟା ତାହାର

ସେତିକି ଖିଆର ମଜା !

ଦେହକୁ ଫୁଲେଇ ଲାଙ୍ଗୁଡ଼ ଟେକିଲେ

ବିଲୁଆ ହେବନି ସିଂହ

କଅଁଳ ବଚନ ଯେତେ ବି ଭାଷିଲେ

ଚତୁର ନିଲଠା ସ୍ନେହ !

ମାଟିରେ ଦେଖିକି ସିଂହର ପଞ୍ଝାକୁ

ବିଲୁଆ କରୁଛି ମାପ

ବିଲୁଆ ପଞ୍ଝାଟା ଜମା ତ ମିଶୁନି

ମିଛରେ ବଳକୁ ଧାପ !

ବିଲୁଆ ଡୋଳାକୁ ଯେତେ ବୁଲାଇଲେ

ହେବନି ସିଂହର ଡୋଳା

ତଥାପି ଦୁଷ୍ଟାମି ବିଲୁଆ ପାଜିର

ତୁଛାକୁ କରଇ ଖେଳା !

ସିଂହର ଶିକାର ଦୂରରୁ ଦେଖିଲେ

ବିଲୁଆ ପିଳେହି ପାଣି

ଫୁଟାଣି ଏମିତି ମନରୁ ଛାଡୁନି

ନିଜକୁ ଭାବୁଛି ଗୁଣୀ !

ସିଂହର ରଡ଼ିରେ ଜଙ୍ଗଲ ଫାଟୁଛି

ବିଲୁଆ ଭୟରେ ବୋକା

ଗାତ କି ପଶନ୍ତା ଦେହଟା ଥରୁଛି

ମୁଣ୍ଡଟା ଭ୍ରମୁଛି ଏକା !

ସିଂହର ଜାଗାରେ ବିଲୁଆ କେବେ ବି

ପାରିବ ନାହିଁଟି ବସି

କୌଶଳ କେବଳ ସିଂହକୁ ମାରିବା

ଗଳାକୁ ଥିବଟି ଘୋଷି !