ବିଲୁଆ ବିଚାର

ବିଲୁଆ ବିଚାର ସହସା ପଡ଼ିଲା

ଗହଳ ବୁଦାର ପାଖେ

ରାଜନ ସିଂହକୁ କେମିତି ମାରିବେ

ଶାସନ ଧରିବେ ସୁଖେ ।

ଆଇଁଷ ବିନାରେ ପାଟିଟା ଅରୁଚା

ଖାଇବା ହେଉନି ବେଶି

ସିଂହଟା ମରିଲେ ଆଇଁଷ ମିଳିବ

ଲାଗିବ ବହୁତ ଖୁସି ।

ଚାତର ବିଲୁଆ କଥାରେ ସତର

ବିଲୁଆ ମାରିଲେ ତାଳି

ଆଇଁଷ ଚିନ୍ତାରେ ମନଟା ଉଚ୍ଛନ୍ନ

ସିଂହକୁ ଝାଡ଼ିଲେ ଗାଳି ।

ବିଲୁଆ ଦଳଙ୍କ ମନ୍ଦର ବେଭାର

ନଜର ପଡ଼ିଲା କାଉ

ଫୁଉର୍ ଉଡ଼ିକି ରାଜାଙ୍କ କାନରେ

ଫୋଡ଼ିଲା ବିଲୁଆ ଭାଉ ।

ଭାଲୁ ଓ ମାଙ୍କଡ଼ ହାତୀଙ୍କୁ ଧରିକି

ରାଜାଙ୍କ ମନ୍ତ୍ରଣା କେତେ

ବିଲୁଆ ଦଳକୁ ପାନଟେ ଦେବେ ଯେ

ବଣରୁ ତଡ଼ିବେ ସତେ ।

'ଧୂର୍ତ୍ତତା ମୂର୍ଖତା ଚଳିବ ନାହିଁଟି

ସମାଜ ଆଗରେ କେବେ

ପାଜିଙ୍କୁ ଦଣ୍ଡରେ ମୁଣ୍ଡଟା ଉଡ଼ିବ

ନ୍ୟାୟକୁ ଦେଖିବେ ସର୍ବେ ।'

ଫିକର କରିକି ଗୁହାରୀ ନାଆଁରେ

ବିଲୁଆ ଭେଟିଲେ ରାଜା

ବିଲୁଆ ନେତାଙ୍କ ମୁଣ୍ଡକୁ ଚୋବାଇ

ରାଜା ତ ଖାଇଲେ ମଜା ।

ଲାଙ୍ଗୁଡ଼ ଜାକିକି ବିଲୁଆ ଦଳଟା

ଦଉଡ଼ ମାରିଲେ ହଗି

ହାତୀକୁ ମାଙ୍କଡ଼ ଭାଲୁଏ ମିଶିକି

ଖୋବାକୁ ଲଦିଲେ ଜଗି ।

ବିଲୁଆ ଦଳଟା ବିକଳେ କାନ୍ଦିକି

ବଣରୁ ବାହାର ହୋଇ

ଜୀବନ ନାଟିକା ଧରିକି ରହିଲେ

ଅମଡ଼ା ବଣର ଛାଇ ।