Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

SOUBHAGYA GIRI

Others


4.9  

SOUBHAGYA GIRI

Others


ବିଦେଶିନୀ ବନାମ ରଜପର୍ବ

ବିଦେଶିନୀ ବନାମ ରଜପର୍ବ

12 mins 11.7K 12 mins 11.7K

■ବିଦେଶିନୀ ବନାମ ରଜପର୍ବ■

ଏକ ଶାନ୍ତ ଅପରାହ୍ନ l ଶାନ୍ତିଦେବୀ ବସିଥାନ୍ତି ବୈଠକ ଘରେ l ଭାରି ରକ୍ଷଣଶୀଳା,ଧର୍ମପରାୟଣ ମହିଳା l ପେପର୍ ଟା ଓଲଟେଉଥାନ୍ତି l ଏଇ ସମୟରେ ଫୋନ ଟା ରିଙ୍ଗ ହେଲା l

ସେପଟୁ ପୁଅ ବିକାଶ ର ସ୍ୱର :-" ମା' ,ଆମେ କାଲି ଦଶଟାରେ ଏୟାରପୋର୍ଟ ରେ ପହଞ୍ଚିବୁ l ତୁ ରାମୁ କାକା ଙ୍କୁ କହିଦବୁ ସେ ଏୟାରପୋର୍ଟ ଆସିଥିବେ l ଦେଖ୍ ମା, କାଲି ପ୍ରଥମ ଥର ବନ୍ଦିତା ଆମଘରେ ପାଦ ଦେବ l ତୁ ରାଗିବୁନି ମା l ମୁଁ ସତ କହୁଛି, ବନ୍ଦିତା ତୋ ପସନ୍ଦ ର ଝିଅ l

 ଫୋନ ରଖିଲେ ଶାନ୍ତି ଦେବି l ଅଶାନ୍ତି ରେ ଭରା ମନ l କେମିତି ବା ଅଶାନ୍ତି ହେବନି l କେତେ ସ୍ବପ୍ନ ଦେଖିଥିଲେ ସେ l ତାଙ୍କ ପୁଅ ବଡ ହେବ l ଚାକିରି କରିବ l ସେ ବୁଲି ବୁଲି ବୋହୁ ଚୟନ କରିବେ l ବାଛି ବାଛି ଗୋଟେ ସର୍ବ ଗୁଣ ସମ୍ପର୍ଣ ଝିଅ କୁ ବୋହୁ କରିବେ l ଯିଏ ରୂପରେ,ଗୁଣରେ,ସଂସ୍କାରରେ ସବୁଥିରେ ଏକ ନମ୍ବର ହୋଇଥିବ l ଆଉ ପୂଜାପାଠ,ଓଷା ବାର ସବୁଥିରେ ପାରଙ୍ଗମ ହୋଇଥିବ l 

    ହେଲେ କଣ ହେବ ? ପାଠ ପଢ଼େଇ ପୁଅ କୁ ଉଚ୍ଚ ଶିକ୍ଷିତ କଲେ l ପୁଅ ଚାକିରି କରିବାକୁ ବିଦେଶ ଚାଲିଗଲା l ଆମେରିକା ରେ ଦୁଇ ବର୍ଷ ରହିଲା ପରେ ଏଇ ବର୍ଷେ ହେବ ଅଷ୍ଟ୍ରେଲିଆ ଯାଇଛି l ସେଇଠୁ ପ୍ରେମ କରି ବାହା ହୋଇ ପଡିଚି ଗୋଟେ ବିଦେଶୀ ଝିଅ କୁ l ଯେକି ବଢିଛି ସମ୍ପୂର୍ଣ ସହରୀ ସଭ୍ୟତାରେ l 

          ଛି.. ଛି.. ଛି... କି ବେଳ ହେଲା କେଜାଣି ଏ ପିଲାଗୁଡ଼ା ଆଉ ବାପା ମା ଙ୍କୁ ମାନିବାକୁ ପ୍ରସ୍ତୁତ ନୁହନ୍ତି l ନିଜେ ନିଜେ ଦେଖି ବାହା ହେଇ ପଡୁଛନ୍ତି l କେତେ ସୁନ୍ଦର ଥିଲା ଆମ ସମୟ l ବାପା ମା ଯୋଉଠି ଠିକ କରୁଥିଲେ ଆମେ ସେଇଠି ହଁ କରୁଥିଲୁ l ହଁ କରିବା ଗୋଟାଏ କଣ ମ ? ବାପା ମା ଠିକ କରିବା ଅର୍ଥ ସେଇଟା ହେଲା ଆମର ହଁ l ବଡ଼ମାନେ ବାହାଘର କଥା ହେଲାବେଳେ ଆମେ କୋଉଠି କେମିତି ଟିକେ ଲୁଚିକି ପଦେ ଅଧେ ଶୁଣି ଦେଉଥିଲୁ l ଆଉ ପୁଅ ଝିଅ ପରସ୍ପରକୁ ଦେଖିବା ସେତେବେଳେ ବିଲକୁଲ ଗୋଟେ ଅସମ୍ଭବ କଥା ଥିଲା l ବାହାଘର ଦିନ ବି ଦେଖି ହେଉନଥିଲା l ଚଉଠି ରାତିରେ ଝାସପା ଝାସପା ଦୀପ ଆଲୁଅରେ ବରକନିଆ ପରସ୍ପରକୁ ଦେଖୁଥିଲେ l ତାପରେ ସଂସାର ଆରମ୍ଭ କଲେ ଯାଇ ଭଲସେ ଦେଖାଚାହାଁ l 

     ଆଉ ଇଏ ଯୋଉ ଯୁଗ l ବାହାଘର ନ ହେଉଣୁ ପୁଅ ଝିଅ ଯାଇ ଆଗେ ମୁଦି ପିନ୍ଧା ପିନ୍ଧି ହେଉଛନ୍ତି l ସେଇଟା ନିଜେ ଠିକ କରିବା ବାହାଘର ହେଉ କି ବାପା ମା ଠିକ କରିବା ବାହାଘର ହେଉ l ମୁଦି ପିନ୍ଧା ସାରିଲେ ପୁଣି ଫିଲ୍ମ ସୁଟିଂ କରିବାକୁ ପଳାଉଛନ୍ତି l କଣ ଗୋଟାଏ କହୁଛନ୍ତି ତ ତାକୁ....... ମୋର କଣ ମନେପଡୁଛି l ସେଇ ଯୋଉ ସୁଟିଂ ଟା ବାହାଘର ଆଗରୁ ହୁଏ ସେଇଟା l ସେତିକି ରେ କଣ ସରିଲା l ବାହାଘର ସୁଟିଂ, ବାହାଘର ପରେ ଗୋଟଏ ସୁଟିଂ l ଆହୁରି ପୁଣି ପିଲା ପିଲି ହେବାକୁ ଥିଲେ ସେଇଟା ବି ଗୋଟାଏ ସୁଟିଂ l ଆଜି କାଲିକା ଝିଅ ଙ୍କୁ ଆଉ ଲାଜ ସରମ ନାଇଁ l ସେଗୁଡା ସବୁ ପୋଡିକି ଖାଇ ସାରିଲେଣି l କହିଲେ କହୁଛନ୍ତି ସେମାନେ ସବୁ ମଡର୍ଣ ଯୁଗର ଝିଅ l ଆଉ ଆମେ ସବୁ କାଳେ ଷାଠିଏ ମସିହା ଲୋକ l କିଛି ଅନ୍ଧବିଶ୍ୱାସ ଆଉ କୁସଂସ୍କାର ଛାଡିଦେଲେ ଆମେ କାଳେ କିଛି ଜାଣିନୁ l ତାଙ୍କ ହାବଭାବ ଚାଲିଚଳନ ଦେଖିଲେ ଦେହରେ ନିଆଁ ଲାଗିଯାଉଛି l ଝିଅ ଗୁଡା ଟାଇଟ ଜିନ୍ସ ପିନ୍ଧୁଛନ୍ତି l ଆଉ ବୋହୁ ଗୁଡା ବି ଆଜି କାଲି ଝିଅ ଙ୍କୁ ବଳି ଗଲେଣି l ମୁଣ୍ଡରେ ଓଢଣା ନାଇଁ, ହାତରେ ଚୁଡି ଶଙ୍ଖା ନାଇଁ, ମଥାରେ ସିନ୍ଦୁର ଟୋପାଏ ବି ନାହିଁ l ଘର ଛାଡି ସବୁ ଯାଇ ବାହାରେ l ଖାଲି ପାନରୁ ଚୁନ ଖସିଲେ ସ୍ୱାମୀ ଶ୍ୱଶୁର ଙ୍କ ନାଁ ରେ ଯୌତୁକ ନିର୍ଯାତନା କେସ୍ l ନହେଲେ ସ୍ୱାମୀ ଠାରୁ ଛାଡପତ୍ର l ଆଉ ଅଧେ ତ ବାହାଘର ପରେ ବି ବାପଘର ଛାଡ଼ୁନାହାନ୍ତି l ସ୍ୱାମୀ କୁ ଶିଖେଇ ଆଣି ବାପଘରେ ଘରଜ୍ୱାଇଁ ସଜାଉଛନ୍ତି l ଆଜି କାଲି ସ୍ତ୍ରୀ ଙ୍କର କଣ ଆଉ ସ୍ୱାମୀ ର ମାନମର୍ଯ୍ୟାଦା ଗଲା କି ରହିଲା ସେ ବିଷୟରେ କିଛି ଚିନ୍ତା ଅଛି ? 

      ଏଇମିତି ଗରଗର ହେଉଥାନ୍ତି ରାଗରେ l ମନରେ ତାଙ୍କର ବୋହୁ ପାଇଁ ବହୁତ ଘୃଣା l ହେଲେ ଗୋଟାଏ ବୋଲି ପୁଅ l କିଛି କହିଦେଲେ ସେ କାଳେ ଘରକୁ ଆସିବା ବନ୍ଦ କରିଦେବ l ତେଣୁ ବାଧ୍ୟତାମୂଳକ ଭାବେ ଟିକେ ଖୁସି ହେବାର ଅଭିନୟ କରିବାକୁ ପଡିବ l 

   ବର୍ଷକୁ ଥରେ ରଜ ଛୁଟି ରେ ଘରକୁ ଆସେ ପୁଅ l ଆମ ଗାଁ ରେ ରଜ ପର୍ବ ଟା ସବୁଠୁ ବଡ l ସେଇ ସମୟରେ ଗାଁ ରେ ଯାତ୍ରା ହୁଏ l ବାହାରେ ରହୁଥିବା ଗାଁ ର ଯୁବକ ହୁଅନ୍ତୁ କି ଝିଅଝିଆଣି ସମସ୍ତେ ଗାଁ କୁ ଆସନ୍ତି l ବଡ ଧୁମ୍ ଧାମ୍ ରେ ରଜ ପର୍ବ ପାଳନ ହୁଏ l ତାପରେ ପୁଣି ସବୁ ଯେଝା ବାଟରେ ଯେଝା ଯା'ନ୍ତି l  ହୁଁ.... ମୋ ଘରେ ଆଉ ରଜ କଣ ? ଘରକୁ ସଂସ୍କାରୀ ଓଡ଼ିଆଣୀ ବୋହୂଟିଏ ଆଣିଥିଲେ ସିନା ସେ ରଜ କରିଥା'ନ୍ତା l ହେଲେ ମୋ ଘରକୁ ଆସୁଛି ଗୋଟେ ବିଦେଶିନୀ l ସିଏ ବା କଣ ବୁଝିବ ରଜ ପର୍ବ ବିଷୟରେ l ଛାଡ଼, ସବୁ ମୋ ଫଟା କପାଳ ର ଦୋଷ l କପାଳ କୁ ନିନ୍ଦା କରିବା ଛଡା ଆଉ ବା କଣ ଉପାୟ ଅଛି ତାଙ୍କ ପାଖରେ ?  

       ତା ପରଦିନ ଠିକ ସମୟରେ ପୁଅ ବୋହୁ ପହଁଚିଲେ l ଗାଡ଼ିରୁ ଓହ୍ଲେଇ ପଡିଲା ବୋହୁ l ଦେହରେ ନାଲି ଶାଢ଼ୀ, ଶଙ୍ଖା ଚୁଡି, ପାଦରେ ପାଉଁଜି, ହେଲେ ମୁହଁ ଟା ଦିଶୁନଥିଲା l ମଥା ଲୁଚି ଯାଇଥିଲା ଓଢଣା ରେ l ଇଏ କଣ ଦେଖୁଛନ୍ତି ଶାନ୍ତି ଦେବୀ ! ପୁଅ ତ କହିଥିଲା ସେ ଗୋଟେ ବିଦେଶୀ ଝିଅ କୁ ବାହା ହେଇଚି l ତା ନାଁ...... କଣ ଗୋଟାଏ ବିଦେଶୀ ନାଁ କହୁଥିଲା l ଆଉ ଇଏ ପୁଣି କିଏ ? ମନରେ ତାଙ୍କର ଅନେକ ପ୍ରଶ୍ନ l ହେଲେ ବି ବନ୍ଦାପନା ଥାଳି ଟା ଆଣି ବୋହୁ କୁ ବନ୍ଦେଇଲେ l

    ଆରେ ୟାକୁ ମୁଁ କଣ କହି ଭିତରକୁ ଡାକିବି l ଇଏ ତ କିଛି ବୁଝିବନି l ମୁଁ ତ ସେ ଇଂରାଜୀ କହିପାରିବିନି l ଏବେ ଡାକିବି କେମିତି ? ମନ କଥା ମନରେ ଅଛି, ବୋହୁ ପଚାରିଲା :- ମା' , ମୁଁ ଏବେ ଭିତରକୁ ଆସିପାରିବି ?  

ଆହୁରି ଆଶ୍ଚର୍ଯ୍ୟ ବଢିଗଲା ଶାନ୍ତି ଦେବୀଙ୍କର l ପୁଅ କ'ଣ ତେବେ ମୋତେ ମିଛ କହିଛି, ଇଏ କ'ଣ ବିଦେଶୀ ଝିଅ ନୁହେଁ ?  

ତର ତର ହୋଇ କହିଲେ -" ହଁ , ହଁରେ ମା ଭିତରକୁ ଆ l  

      ବିକାଶ ଆଉ ଚାହୁଁ ନଥିଲା ତା ମା ର ମୁଣ୍ଡ ଗୋଳମାଳିଆ ହେଉ. କହିଲା -" ମା ,ମୁଁ ତୋତେ ସତ କହିଚି, ଇଏ ଅଷ୍ଟ୍ରେଲିଆ ଝିଅ ବ୍ରୁକଲିନ୍ l ହେଲେ ମୁଁ ଡାକେ ବନ୍ଦିତା l ତୁ ବି ସେୟା ଡାକିବୁ l ଆଶ୍ଚର୍ଯ୍ୟ ହ ନା ମା' l . ସେ ଓଡ଼ିଆ ଜାଣିଛି l ମୁଁ ତାକୁ ଓଡ଼ିଆ ଶିଖେଇ ସାରିଛି l କେବଳ ଓଡ଼ିଆ ଭାଷା ନୁହେଁ ମା, ଓଡ଼ିଆ ଘରର ସଂସ୍କୃତି,ପରମ୍ପରା,ପର୍ବପର୍ବାଣି ସବୁ ତାକୁ ଜଣା l 

   ହଉ ଶୁଣ୍ ମା, ତୁ କଣ ଖାଇବାକୁ କରିଚୁ ବାଢିଲୁ l ମୋତେ ପ୍ରବଳ ଭୋକ l  

    " ହଁ ତୁମେ ଦୁଇ ଜଣ ଧୁଆ ଧୁଇ ହୋଇପଡ଼ ଟିକେ l ମୁଁ ଖାଇବା ବାଢି ଦେଉଚି l "

     ଖାଇବା ବାଢିବା ପୂର୍ବରୁ ଶାଶୁଙ୍କ ହାତରୁ ନେଇଗଲା ବନ୍ଦିତା l ନିଜେ ଖାଇବା ବାଢିଲା l ଖାଇସାରି ଟିକେ ବିଶ୍ରାମ କଲେ ପୁଅ ବୋହୁ l ଶାନ୍ତି ଦେବୀଙ୍କ ମନ ସେମିତି ଗୋଳେଇ ଘାଣ୍ଟି ହେଉଥାଏ l 

     ରାତିରେ ରୋଷେଇ କରିବାକୁ ଗଲା ବନ୍ଦିତା l ଶାଶୁ ପଛରେ ଧାଇଁଗଲେ l

      "ଆମର ଏଇଟା ଗାଁ, ଏଠି ସବୁ ରାତିରେ ଆମେ ଭାତ ଖାଉ l ତୁ ଜାଣିବୁନି l ତୁ ଯା,ମୁଁ ରୋଷେଇ କରୁଛି l ତୋପାଇଁ ରୁଟି ଦିଟା କରିଦେବି l 

     "ନା ମା' , ମୁଁ ରୋଷେଇ କରିବି l ରୋଷେଇ କରିବା ପାଇଁ ଜିଦ୍ ଦେଖି ଶାନ୍ତି ଦେବୀ ବାଧ୍ୟ ହୋଇ ରୋଷେଇ ଘରୁ ଚାଲି ଆସିଲେ l 

 ରୋଷେଇ ସରିଲା l ସମସ୍ତେ ଖାଇ ବସିଲେ l ଭାତ, ହରଡ଼ ଡାଲି, ପୋଟଳ ତରକାରୀ, ଭେଣ୍ଡି ଭଜା l ପ୍ରତିଟି କାମ ଆଶ୍ଚର୍ଯ୍ୟ ହେଉଥାଏ ଶାନ୍ତି ଦେବୀ ଙ୍କର l କାମ ସାରି ରାତିରେ ବନ୍ଦିତା ଶାଶୁଙ୍କ ଗୋଡ ହାତ ଘଷିଦେଲା l

 ବୋହୂ ହାତର ସ୍ପର୍ଶ ପାଇ କେତେବେଳେ ଶାନ୍ତି ଦେବୀ ଙ୍କର ନିଦ ଲାଗି ଯାଇଛି l 

ରାତି ଚାରିଟା ବାଜିଲାଣି l ଉଠିଲା ବନ୍ଦିତା l ଗୋବର ପାଣି କରି ପବିତ୍ର ପାଣି ପକେଇଲା l ଦାଣ୍ଡ ଓଳେଇଲା, ଘର ଖରକିଲା l ବାଡ଼ି ସାରା ବୁଲି ନାନା ରକମର ଫୁଲ ତୋଳିଲା l ହଳଦୀ ଗିନାଟା ଧରି ଗାଧୋଇ ବାହାରିପଡିଲା l କୂଅ ମୂଳେ ପହଂଚି ସାରିଥିଲା l ହେଲେ ପାଣିତ ଏତେ ଭିତରେ l ସେ ଏବେ ପାଣି କେମିତି ଆଣିବ ସେଠୁ l ସେଇଠୁ ଫେରିଲା l ବିକାଶ କୁ ଡାକିଲା l ବିକାଶ ଶିଖେଇଦେଲା ପାଣି କଢ଼ା l ଠାକୁର ଘର କୁ ଗଲା ଗାଧୋଇ ସାରି l

  " ଓଁ ଗଂ ଗଣପତୟେ ନମଃ " ରୁ ପୂଜା ଆରମ୍ଭ କଲା l ତାପରେ ବିଭିନ୍ନ ମନ୍ତ୍ର l ତାପରେ ପୂଜା ପାଠ, ଧୂପ ଦୀପ ଇତ୍ୟାଦି l ଘଣ୍ଟ ଶବ୍ଦ ରେ ନିଦ ଭାଙ୍ଗିଗଲା ଶାନ୍ତି ଦେବୀ ଙ୍କର l ଫର୍ଚ୍ଚା ହେଇ ଆସୁଥାଏ l  

      ଏତେ ସକାଳୁ ସୂର୍ଯ୍ୟୋଦୟ ପୂର୍ବରୁ ମନ୍ତ୍ର ପାଠ ସହ ଦେବପୂଜା l ବିକାଶ କଣ ଏବେ ପୂଜା ପାଠ ରେ ମନ ଦେଲାଣି l ହଉ ଭଲ ହେଲା l 

  ଶାନ୍ତି ଦେବୀ ନିଜ ହାତ ପାପୁଲି ଦ୍ବୟ କୁ ଦେଖି ଦେଖି ମନ୍ତ୍ର ପାଠ କଲେ.  

       " କରାଗ୍ରେ ବସତେ ଲଷ୍ମୀ କରମଧେ ସରସ୍ବତୀ, 

        କରମୂଳେ ତୁ ଗୋବିନ୍ଦ ପ୍ରଭାତେ କର ଦର୍ଶନମ୍. "

 ଏଇ ମନ୍ତ୍ର ରୁ ଆରମ୍ଭ ହୁଏ ତାଙ୍କ ଦିନ l 

ରଥାରୂଢ ହେଉଥିଲେ ସୂର୍ଯ୍ୟ ଆକାଶ ବକ୍ଷକୁ ଉଠିବା ପାଇଁ l 

" ଓଁ ଆଦିତ୍ୟାୟ ବିଦ୍ମହେ ମହାତେଜାୟ ଧୀମହି ତନ୍ନୋ ସୂର୍ଯ୍ୟ ପ୍ରଚୋଦୟାତ୍ "

 " ଓଁ ଘୃଣି ସୂର୍ଯ୍ୟାୟ ନମ: "- ସୂର୍ଯ୍ୟଙ୍କୁ ଅର୍ଘ୍ୟ ଦେଉଥିଲା ବନ୍ଦିତା l 

ସୂର୍ଯ୍ୟପୂଜା ପରେ ଆଳତୀ ଘରେ ବୁଲେଇଲା l ଶାଶୁଙ୍କ ପାଦ ଛୁଇଁ ପ୍ରଣାମ କଲା l ଶାନ୍ତି ଦେବୀ ଏ କଣ ଦେଖୁଛନ୍ତି ! ବୋହୂ ପିନ୍ଧିଛି ତାଙ୍କ ଆଲମାରୀର କର୍ପୂର ଦିଆ ଶାଢୀ l ଧିରେଧିରେ ବଢି ଚାଲିଥାଏ ତାଙ୍କ ମନର ଆଶ୍ଚର୍ଯ୍ୟ ଆଉ କମି ଚାଲିଥାଏ ବୋହୂ ପ୍ରତି ଥିବା ଘୃଣା ଭାବ l 

ବନ୍ଦିତା ଚାଲିଗଲା ରୋଷେଇ ଘରକୁ l ଚୂଲି ଲଗାଇ ଆଗେ ଚା' ହାଣ୍ଡିଟା ବସେଇଲା l ତା'ପରେ ଜଳଖିଆ ତିଆରି କଲା l ସମସ୍ତେ ଜଳଖିଆ ଖାଇଲେ l 

ବିକାଶ ଚାଲିଗଲା ଗାଁ ଭିତରକୁ l ଆଉ ଶାନ୍ତି ଦେବୀ ପଡିଶା ଘରକୁ l ଲୀନା ବୋଉ,କାଳିଆ ବୋଉ,ରତନୀ ମା' ଏମିତି ସମସ୍ତଙ୍କୁ ଜଣେଇ ଦେଇ ଆସିବେ ବୋହୂଟା ତାଙ୍କର ବିଦେଶୀ ଝିଅ ହେଲେ ବି ଓଡିଆଣୀଠୁ କୋଉ ଗୁଣରେ କମ୍ ନୁହେଁ l 

  ବନ୍ଦିତା ଗାଧୁଆବେଳ ପାଇଁ ରୋଷେଇ ଆରମ୍ଭ କଲା l ସେଇଠି ଜିରା,ଲଙ୍କା,ହଳଦୀ ସବୁ ଗୋଟେ ଗୋଟେ ଗୁଣ୍ଡ କରି ରଖୁଥାଏ l ହେମଦସ୍ତାକୁ ଚାପି ଧରିଧରି ଗୋରା ହାତଟା ଏକଦମ୍ ନାଲି ପଡି ଯାଇଥାଏ l ଆଉ କେଇଟା ଦିନ ରହିଲା ରଜ l ରଜ ତିିନି ଦିନ ତ କୁଟା,ବଟା,ଛେଚା ସବୁ ବନ୍ଦ l ସେଥିପାଇଁ ଆଗରୁ ସବୁ ପ୍ରସ୍ତୁତ କରି ରଖିବାକୁ ପଡିବ l 

ୟା ଭିତରେ ଶାନ୍ତିଦେବୀଙ୍କର ଦିନଗୁଡା କେମିତି କଟିଯାଉଛି କିଛି ଜଣା ପଡୁନି l ତାଙ୍କର ତ ଏବେ ସେଇ ଗୋଟିଏ ହି କାମ l ଗାଁ ସାରା ବୁଲି ନିଜ ବୋହୂର ଭୁରିଭୁରି ପ୍ରଶଂସା କରିବା l 

ରଜ ଆଉ ଦି' ଟା ଦିନ l କାଲିକି ସଜବାଜ l ଶାନ୍ତିଦେବୀ ଭାବିଲେ ଯାଉଛି ଗାଁ ଯାକର ଝିଅଙ୍କୁ କହି ଦେଇ ଆସିବି " ଆମ ଘରକୁ ରଜ ବୁଲି ଆସିବ,ନୂଆ ଭାଉଜଙ୍କୁ ବି ଦେଖି ଆସିବ " l 

ସେପଟୁ ବନ୍ଦିତା ଡାକିଲା - ମା' ,ଟିକେ ଶୁଣ l ଏତିକି ବିରି ଚୁରି ଦେଉଛି l ଏତିକି ଚାଉଳ ପୋଡପିଠା ପାଇଁ l ଏତିକି ଆରିଷା ପିଠା ଛାଣିବା l ଆଉ ଏତିକି ଚକୁଳି ଆଣ କରିବା l ଅଲଗା ଅଲଗା କରି ଦେଖାଇଲା l 

   " ଆଲୋ ମା,ଆମେ ତ ଲୋକ ବୋଲି ତିନି ଜଣ l ତୁ ଏତେ ସବୁ ବିରିଚାଉଳ କାହିଁ ପକେଇଛୁ ?"

   " ମା' , ପହରଦିନ ରଜ l ଆମ ଗାଁ ଝିଅମାନେ ଆମ ଘରକୁ ରଜବୁଲି ଆସିବେ l ସେମାନେ ଖାଇବେ l ସାଇପଡିଶାଙ୍କୁ ବଣ୍ଟା ହେବ l ଆଉ ଚାଉଳ କମେଇ ଦେଲେ ହେବନି ବୋଧେ l

  ଶାନ୍ତିଦେବୀ ଭାବିଲେ " ବୋହୂ ମୋ ମନକଥା ଜାଣିଲା କେମିତି ? ସେ କେମିତି ଜାଣିଲା ଯେ ରଜରେ ଝିଅମାନେ ବୁଲି ଆସନ୍ତି ବୋଲି ?

  ଆଉ ଶୁଣ ମା' ୟାଙ୍କୁ ଟିକେ କହଦେବ ଆଜି ବଜାରରୁ ପାନ,ଗୁଆ,ମିଠାମସଲା ଆଣିବେ l ଆଉ ଆମ୍ବ,ପଣସ,ସପୁରୀ ଏମିତି କିଛି ଫଳ ବି ଆଣିବେ l ତମେ ଗାଁ ଭିତରୁ ଆସିଲେ ଆମେ ଚାରିଟା ବେଳକୁ ଆରିଷା ପିଠା ଛାଣିଦେବା l ଆଉ ପୋଡପିଠା ତ କାଲି ରାତିକି ବସାହେବ l 

 " ହଉ,ତୁ ସବୁ ସଜାଡି ରଖ୍ l ମୁଁ ଯାଉଛି ଗାଁ ଭିତରୁ ଆସେ l 

 ଶାନ୍ତିଦେବୀ ଚାଲିଗଲେ ଗାଁ ଭିତରକୁ l ବନ୍ଦିତା ତା'ର ଚାଲିଚଳଣ,କଥାବାର୍ତ୍ତା,ସଂସ୍କାର ଆଉ ମାର୍ଜିତ ବ୍ୟବହାର ରେ ଶାଶୁଙ୍କ ମନ କିଣି ସାରିଲାଣି l 

 ରାତିରେ ବନ୍ଦିତା ଶାଶୁଙ୍କ ଗୋଡ ମୋଡି ଦେଉଥାଏ l 

 " ମା' ରେ , ତୁ କାଲି ଯେତିକି କାମ ସାରିବା କଥା ସାରିଦେବୁ l ଆଉ ଯାହା ରହିଲା ମୁଁ କରିବି l ରଜରେ ତୁ ଆଉ କିଛି ବି କାମ କରିବୁନି l ତୋର ପରା ଏଇଟା ପ୍ରଥମ ରଜ l ଏଇ ତିନିଦିନ କାମ ମୁଁ କରିବି l ହଉ,ଉଠିିକି ଗଲୁ ସେ ଆଲମାରୀରେ ଗୋଟେ ନାଲିଆ ରଙ୍ଗର ଜରି ଅଛି ଆଣିବୁ l 

    ବନ୍ଦିତା ଉଠିଯାଇ ଜରି ଆଣିଲା l 

ଶାଶୁ ଜରି ଖୋଲି ଦେଖାଇଲେ ଗୋଟେ ନୂଆ ଶାଢୀ,ଚୁଡି,ଅଳତା,ସିନ୍ଦୁର ଆହୁରି କେତେ ସବୁ ସଜବାଜ ଜିନିଷ l 

" ଦେଖିଲୁ ,ଏ ଶାଢୀ ତୋ ମନକୁ ଯାଉଚି ତ ? "

 " ହଁ ମା' , ବଢିଆ ହେଇଛି l "

 ଆଜି ସଜବାଜ l ସବୁ କାମଗୁଡା ସାରିବାକୁ ପଡିବ l କାମଗୁଡା ବାକି ରହିଗଲେ ମା' ଏତେ କାମ ଏକା କରିବାକୁ ହଇରାଣ ହେବେ l ଆଉ ଟିକେ ହାତ ଫୁର୍ତ୍ତି କଲା ବନ୍ଦିତା l 

   ସବୁକାମ ସରିଗଲାଣି l ଏଇ ପୋଡପିଠାଟା ବସେଇଦେଲେ ସରିଲା l ନିଦ ବି ଜୋର୍ ରେ ଆସିଲାଣି l 

 ତା' ପରଦିନ ରାତିରୁ ଉଠିଲା ବନ୍ଦିତା l ବଟା ହଳଦୀ ମାରିହେଇ ଗାଧେଇଲା l ନୂଆଶାଢୀ,ଶଙ୍ଖାଚୁଡି,ଗହଣା ସବୁ ପିନ୍ଧିଲା l କେଶସଜ୍ଜା କଲା l ଅଳତା ଲଗେଇଲା l ଠାକୁରପୂଜା କରିବାକୁ ଚାଲିଗଲା l ସେଦିନ ଶାନ୍ତି ଦେବୀ ବି ସକାଳୁ କାମରେ ଲାଗି ଯାଇଥା'ନ୍ତି l ପିଠା,ତରକାରୀ ଏଇସବୁ କରୁଥା'ନ୍ତି l 

  ଶାଶୁଙ୍କୁ ପ୍ରଣାମ କରିସାରି ଆସୁଥାଏ ବନ୍ଦିତା l ହାତ ଧରି ଭିଡିନେଲା ବିକାଶ l " ଆସ ଦେଖିବ,ତମ ପାଇଁ ଗୋଟେ ସରପ୍ରାଇଜ୍ ଅଛି l "

  " କି ସରପ୍ରାଇଜ୍ ମ ସକାଳୁ ସକାଳୁ ?"

 " ଏଇ ଦେଖ "

" ଆରେ ଇଏ ତ ଦୋଳି l ପାର୍କରେ ଲାଗିଥାଏ l ହେଲେ ସେଇଟା ଲୁହାରେ ତିଆରି ହେଇଥାଏ l ଆଉ ତମେ ଏଇଟା ଲଗେଇଚ ବାଉଁଶ ଆଉ କାଠପଟାରେ l କିନ୍ତୁ ତମେ ତ କହିଥିଲ ରଜ ତିନି ଦିନ ଧରିତ୍ରୀ ମାତା ରଜସ୍ୱଳା ହୁଅନ୍ତି l ତେଣୁ ମାଟି ହାଣିବା,ଖୋଳିବା ବା ମାଟିକୁ କିଛି ବି କଷ୍ଟ ଦେବା ପାପ l ଏବେ ତମେ ନିଜେ ପୁଣି ଏ ଦୋଳି କାହିଁକି ଲଗେଇଲ l ପରେ ଲଗେଇଥିଲେ ହେଇନଥାନ୍ତା l "

    " ନା, ଏ ଦୋଳି ପରେ ଲଗେଇଥିଲେ ହେଇ ନଥାନ୍ତା l ଇଏ ପରା ରଜଦୋଳି l ରଜଦୋଳି ରଜରେ ସବୁ ଝିଅ ବୋହୂମାନେ ଖେଳନ୍ତି l ହେଲେ ପୁଅପିଲା ବି ଛାଡନ୍ତିନି l ଟିକିଏ ସୁଯୋଗ ପାଇଲେ ଆସି ବସିପଡନ୍ତି l ମୁଁ ଏ ଦୋଳି ଆଜି ଲଗେଇନି l କାଲିଠୁ ଲଗେଇ ଦେଇଥିଲି l ତେଣୁ ତମେ କିଛି ଚିନ୍ତା କରନି l "

   " ତମେ ତ ମତେ ଏ ରଜଦୋଳି କଥା ଆଗରୁ କହି ନଥିଲ ? ତମେ ତ କହିଥିଲ ଝିଅମାନେ ଗାଁ ବୁଲନ୍ତି,ରଜପାନ ଖାଆନ୍ତି,ପୁଚି ଖେଳନ୍ତି,ଲୁଡୁ ଖେଳନ୍ତି l ଆଉ ପୁଅମାନଙ୍କର ବାଗୁଡି ପ୍ରତିଯୋଗିତା ହୁଏ l "

    " ସବୁ କଥା ଯଦି ତମକୁ ଆଗୁଆ କହି ଦେଇଥା'ନ୍ତି ତାହାଲେ ସରପ୍ରାଇଜ୍ କ'ଣ ଦେଇଥା'ନ୍ତି l ଆସ, ଦୋଳିରେ ବସ ମୁଁ ଝୁଲେଇ ଦେଉଛି l "

   " ନା ନା, ଥାଉ l ଏଇଟା ଗାଁ l କିଏ ଦେଖିଲେ କ'ଣ ଭାବିବେ ? ଗାଁ ଝିଅମାନେ ଆସନ୍ତୁ l ଆମେ ମିଶିକି ଖେଳିବୁ l " ବିକାଶଙ୍କ ହାତରୁ ଖସି ଚାଲିଗଲା ବନ୍ଦିତା l

     ଗାଁ ଝିଅ ମାନେ ଆସିଲେଣି l ଶାନ୍ତି ଦେବୀ ପରଶି ଦେଲେ ନାନା ରକମର ଖାଇବା l ଚକୁଳି ପିଠା,ତରକାରୀ,ପୋଡ ପିଠା,ଆରିଷା ପିଠା,ମିଠା,ପାଚିଲା ଆମ୍ବ,ସପୁରୀ ଏମିତି କେତେ କଅଣ l ସମସ୍ତେ ମିଶି ଖାଇଲେ l ଖାଇବା ଶେଷରେ ପୁଣି ଲବଙ୍ଗଦିଆ ବନାରସୀ ପାନ l 

ସମସ୍ତେ ଚାଲିଲେ ବାଡିକୁ l ଦୋଳି ଖେଳିବାକୁ l ଶାନ୍ତି ଦେବୀ ବି ସେମାନଙ୍କ ସହିତ l 

     " ଆରେ ତମେମାନେ ସବୁ ଏଇଠି ଖେଳ l ମୁଁ ଚାଲିଲି l ଆମର ଆଜି ଆର ସାହି ପିଲାଙ୍କ ସହିତ ବାଗୁଡି ପ୍ରତିଯୋଗିତା l ଆଜି ଯିଏ ଜିତିବ କାଲି ସିଏ ଆର ଗାଁ ପିଲାଙ୍କ ସହିତ ଖେଳିବ l - ବିକାଶ ଚାଲିଗଲା ଗାଁ ପଡିଆକୁ l 

 ଲିପି ଖାଲି ପାଦରେ ଆସି ଦୋଳି ପାଖରେ l ବନ୍ଦିତା ଦେଖିଦେଇ କହିଲା - " ଲିପି,ଯାଅ ଚପଲ ପିନ୍ଧି ଆସ l ତମେ ଜାଣିନ କି ରଜରେ ଝିଅମାନେ ଖାଲି ପାଦରେ ଭୂମି ଉପରେ ଚାଲିବା ମନା l ଆଗରୁ ଝିଅମାନେ ଗୁଆ ଖୋଳପାରେ ଜୋତା ତିଆରି କରି ଏହି ରଜ ତିନି ଦିନ ପିନ୍ଧୁଥିଲେ l ଏବେ ତ ଆଉ ସେକଥା ନାହିଁ l ହେଲେ,ପ୍ରଥା ପରମ୍ପରାକୁ ତ ମାନିବାକୁ ପଡିବ l ତମେ ଯାଅ ଚପଲ ପିନ୍ଧି ଆସ l 

 " ହଁ ଭାଉଜ,ଏଇନେ ଯାଉଛି l ଆମର ଗାଁ କଥା ତ l ଆମେ ଅଧିକାଂଶ ସମୟ ଖାଲି ପାଦରେ ବି ଗାଁ ଦାଣ୍ଡରେ ଏଣେତେଣେ ବୁଲୁଥାଉ l ତେଣୁ ଚପଲ ପିନ୍ଧାଟା ଏତେ ମନେ ପଡେନି l - ଲିପି ଚପଲ ପିନ୍ଧି ଆସିଲା l

      "ଭାଉଜ, ତମେ ବହୁତ ଭଲ, କେତେକଥା ଜାଣିଛ | ମୋ ଭାଉଜ ଓଡ଼ିଆଣୀ, ହେଲେ ସେ ମୋତେ ଏସବୁ ଶିଖେଇ ନାହାନ୍ତି - ଲିପି କହିଲା |

   "ହେଲେ ମୁଁ ମୋ ନଣନ୍ଦ ମାନଙ୍କୁ ସବୁ ଶିଖେଇଦେବି "| ଆହୁରି ଶୁଣ, ରଜପର୍ବର ପ୍ରକୃତ ଉଦ୍ଦେଶ୍ୟ ହେଲା ଏହି ସମୟରେ ପୃଥିବୀ ମାତା ରଜସ୍ୱଳା ହୁଅନ୍ତି | ଏହି ଦିନରେ ଆମ ଚାଷୀ ଭାଇମାନେ ହଳଲଙ୍ଗଳ ପୂଜା କରିବା ସହିତ କାମ ବନ୍ଦ କରି ରଖନ୍ତି | ଏ ରଜପର୍ବ କୁଆଁରୀ ମାନଙ୍କୁ ଅନେକ ଶିକ୍ଷା ଦେଇଯାଏ | ସମସ୍ତ ମାତୃଜାତି ଭିତରେ ଉତ୍ସାହ, ଉଦ୍ଦୀପନା ଓ ନୂତନ ଶକ୍ତିର ଜାଗରଣ ହୁଏ | ଗୋଟେ ଝିଅ ନାରୀର ଚଳଣି, ଆଚାରବ୍ୟବହାର, ସଂସ୍କାର କୁ ଵିଧିବଦ୍ଧ ଭାବେ ପାଳନ କରି ଭବିଷ୍ୟତରେ ଗୋଟେ ସମ୍ପୂର୍ଣା ଓ ମା' ଭୂମିକାରେ ଅବତୀର୍ଣ ହୋଇ ନିଜ ଭବିଷ୍ୟତ ସାଂସାରିକ ଜୀବନ କୁ କିପରି ସୁଖମୟ କରିବ,ସେଇ ସଂକେତ ଦେଇଯାଇଥଏ ରଜପର୍ବ |ଏଇ ପର୍ବରୁ ଝିଅ ମାନେ ଶିଖିଥା'ନ୍ତି ଯେ ସେମାନେ କିପରି ନିଜ କର୍ତଵ୍ୟକୁ ସୁଚାରୁ ରୂପେ ତୁଲାଇବା ସହିତ ଭବିଷ୍ୟତରେ ତାଙ୍କ ଝିଅମାନଙ୍କୁ ବି ଏହିପରି ସଂସ୍କାରରେ ଭରା ସଂସାର ନିୟମ ଶିଖାଇବେ |" - ବନ୍ଦିତା କହିଚାଲିଥିଲା | ଅନ୍ୟ ଝିଅମାନଙ୍କ ସହିତ ଶାନ୍ତିଦେବୀ ବି ସତେ ଯେମିତି ଢକ ଢକ କରି ପିଇଯାଉଥିଲେ ସେ କଥାଗୁଡ଼ାକ |

    ଦୋଳିଖେଳରେ ନୀରବତା ଦେଖି ବନ୍ଦିତା କହିଲା, ତମେମାନେ ଚୁପ କାହିଁକି ? ଗୀତ ଗାଅ ନା...... 

  " ବନସ୍ତେ ଡାକିଲା ଗଜ, ବରଷକେ ଥରେ ଆସିଛି ରଜ, 

   ଆସିଛି ରଜ ଲୋ ଘେନି ନୂଆ ସଜବାଜ, 

   ରଜଦୋଳି କଟକଟ, ମୋ ଭାଇ ମୁଣ୍ଡରେ ସୁନା ମୁକୁଟ, 

   ସୁନା ମୁକୁଟ ଲୋ ଦିଶୁଥାଇ ଝଟଝଟ l

     ବନ୍ଦିତା ସହିତ ପାଳି ଧରି ସମସ୍ତେ ଆରମ୍ଭ କରିଦେଲେ ଗୀତ ବୋଲା | ଏଇମିତି ହସଖୁସି ଭିତରେ ରଜ ତିନିଦିନ କେମିତି କଟିଗଲା ଜଣାପଡ଼ିଲାନି | ଆଜି ବସୁମତୀ ସ୍ନାନ l ବନ୍ଦିତା ସକାଳୁ ଗାଧୋଇପଡ଼ି ପିଢା ଉପରେ ଧରିତ୍ରୀ ମାତାଙ୍କ ସ୍ୱରୂପ ଶିଳପୁଆ କୁ ସ୍ଥାପନ କଲା | ହଳଦୀ, ସିନ୍ଦୁର ଲଗେଇଲା l ଆମ୍ବଡାଳ ଦେଇ କ୍ଷୀରଢାଳି ବିଶୁଦ୍ଧ ସ୍ନାନ କରାଇଲା | ଧୂପ, ଦୀପ, ନୈବେଦ୍ୟ ଦେଇ ଭକ୍ତି ରେ ଧରିତ୍ରୀ ମାତାଙ୍କୁ ପୂଜାକରି ଆଶୀର୍ବାଦ ଭିକ୍ଷା କଲା | 

    ନିଜ ଜୀବନର ପ୍ରଥମ ରଜକୁ ମନଭରି ଉପଭୋଗ କରିଥିଲା ବନ୍ଦିତା | ଗାଁ ସାରା ସବୁ ଲୋକଙ୍କ ମୁହଁରେ ଥିଲା ଗୋଟିଏ କଥା - ବନ୍ଦିତା ଏ ଗାଁ ର ଏକ ନମ୍ବର ବୋହୁ | ଶାନ୍ତି ବହୁତ ଭାଗ୍ୟବତୀ | ଏମିତି ଝିଅ କୁ ବୋହୁ ରୂପରେ ପାଇଛି l ଗାଁର ବୁଢାବୁଢ଼ୀ ଲୋକଙ୍କର ଆଶୀର୍ବାଦର ହାତ ଆପଣାଛାଏଁ ଉଠିଯାଉଥିଲା ବନ୍ଦିତା ପାଇଁ |

   ରଜପର୍ବ ସରିବା ସହିତ ବିକାଶ ର ଛୁଟି ବି ସରିଗଲା | କାଲି ସକାଳୁ ସେମାନେ ବାହାରି ପଡିବେ | ରାତିରେ ଖାଇବା ବେଳେ ବନ୍ଦିତା କହିଲା - "ମା ମୁଁ ଆଉ କିଛିଦିନ ଏଇଠି ତମ ପାଖେ ରହିବାକୁ ଚାହୁଁଚି |" 

  " ଆଲୋ ମା, ତୁ ଏଠି ରହିଲେ ପୁଅଟା ମୋର ସେଠି ଖାଇବା ପିଇବାରେ ହଇରାଣ ହେବ l ତୁ ତା ସାଙ୍ଗରେ ଯା l ପୁଣି ଛୁଟି ହେଲେ ଆସିବୁ |" 

  "ମା, ସେ ଯଦି ଚାହୁଁଚି ଆଉ କିଛିଦିନ ତୋ ପାଖେ ରହିବାକୁ ତାହେଲେ, ସେ ଥାଉ | ମୁଁ ପୁଣି କେବେ ମଝିରେ ଆସି ତାକୁ ନେଇଯିବି "- ବିକାଶ କହିଲା | 

  ତା ପରଦିନ ସକାଳେ ବିକାଶ ବାହାରିଲା l ଟ୍ୟାକ୍ସି ଘର ଆଗରେ ଲାଗିଲାଣି l ଜିନିଷପତ୍ର ଗୁଡା ବଢ଼େଇଦେଲା ବିକାଶ ଟ୍ୟାକ୍ସି ଵାଲା ହାତକୁ | ଘର ଦୁଆର ମୁଁହରେ ଛିଡା ହୋଇ ଶାନ୍ତିଦେବୀ ଆଉ ବନ୍ଦିତା ବିଦାୟ ଦେଉଥିଲେ ବିକାଶ କୁ | ବିକାଶ ବୁଲି ଚାହିଁଲା l ମା' ର ସେ ସ୍ନେହବୋଳା ମୁଁହଟା ସ୍ପଷ୍ଟ ଦିଶୁଥିଲା | ହେଲେ ତା ପ୍ରାଣପ୍ରିୟାର ମୁହଁ ଝାପ୍ସା ଦିଶୁଥିଲା ଓଢଣା ଫାଙ୍କରୁ |

   " ଭାଇ ଯିବା ? - ଡ୍ରାଇଭର ପଚାରିଲା |

 " ହଁ, ହଁ ଚାଲ "

    ଡ୍ରାଇଭର ଗାଡି ଷ୍ଟାର୍ଟ କଲା l ଗାଡି ସହିତ ଆଗେଇଯାଉଥିଲା ବିକାଶର ସ୍ବପ୍ନ ଓ ଆଧୁନିକତା | ପଛରେ ରହିଯାଉଥିଲା ଗାଁର ସେ ପ୍ରଥା, ପରମ୍ପରା ଓ ସଂସ୍କୃତି | ବିକାଶ ଯେତିକି ଆଗଉଥିଲା ସଂସ୍କାର ସେତିକି ପଛାଉଥିଲା ଦୂରକୁ ଦୂରକୁ........ ବହୁ ଦୂରକୁ.....


Rate this content
Log in