ଭୂମିକମ୍ପ ହେଲା (ଶିଶୁ କବିତା)

 

ହିମାଳୟ ପାଦଦେଶେ ବହୁଦିନ ତଳେ

ଶଶକ ଟେ ରହୁଥିଲା ତାଳବୁଦା ମୂଳେ ।

ଡଉଲଡାଉଲ ତା'ର ଚେହେରା ସୁନ୍ଦର

ତାଳଗଛ ମୂଳେ ତାର ଛୋଟିଆ ବିବର ।

ଦିନେ ଶଶକଟି ପାଶେ ଚରି ବୁଲି ଆସି

ବିବରେ ଘୁମାଉଥିଲା ଆନନ୍ଦରେ ବସି ।

ଏ କାଳେ ଶୁଭିଲା ଏକ ଭୀଷଣ ଶବଦ

ଶବ୍ଦ ଶୁଣି ଠେକୁଆର ଭାଙ୍ଗିଗଲା ନିଦ ।

ଭୂମିକମ୍ପ ହେଲା ଭୂମିକମ୍ପ ହେଲା କହି

ଦଉଡ଼ିଲା ଶଶକଟି ଲମ୍ୱଲମ୍ଫ ଦେଇ ।

ଭୂମିକମ୍ପ ହେଲା ହେଲା ଶଶକଠୁ ଶୁଣି

ଭୟେ ଦଉଡ଼ିଲେ ସର୍ବ ପଶୁ ଶୁଆ ବଣି ।

ପଥରେ ସଭିଙ୍କୁ ଦେଖି ମହାମନ୍ତ୍ରୀ ବାଘ

ଆଗ ଦଉଡ଼ିଲେ କହି ଭାଗ ଭାଇ ଭାଗ ।

ରାଜ୍ୟରେ ଆତଙ୍କ ଶୁଣି ସିଂହ ପଶୁରାଜ

ଚିନ୍ତାଗ୍ରସ୍ତ କି ହୋଇଲା କି ହୋଇଲା ଆଜ ।

ରାଜ୍ୟରେ ହୋଇଛି ଭୟଙ୍କର ଭୂମିକମ୍ପ

ପଶୁପକ୍ଷୀ ଗଣେ ଖେଳି ଯାଇଛି ଆତଙ୍କ ।

ପଚାରିଲେ ରାଜା ତହୁଁ କରି ଜଣେ ଜଣେ

କିଏ ଦେଖିଛି ଭୂକମ୍ପ ମୁହିଁ ଟିକେ ଶୁଣେ ।

ସର୍ବଶେଷରେ କହିଲା ଭୟାର୍ତ୍ତ ଠେକୁଆ

ମୋଟେ ମିଛ କହୁନାହିଁ ମୁହିଁ ପଶୁ ନାହା ।

ଠେକୁଆର ବାସ ପାଶେ ସର୍ବେ ମିଳି ଗଲେ

ତାଳପତ୍ରେ ବେଲ ଏକ ପଡ଼ିଛି ଦେଖିଲେ ।

ତୁଣ୍ଡର ବାଇଦ ବାଜେ ଶତେ ସହସ୍ର କୋଶ

ଭୂମିକମ୍ପ କାହାଣୀର ଏ ଅଟେ, ସନ୍ଦେଶ ।