ଭୂବନମୋହିନୀ ମା'

ଜଗତ ଜନନୀ ମା'କୁ 

କିଏ ଡାକେ ସିଂହବାହିନୀ 

କିଏ କହେ ମହିଷାମର୍ଦ୍ଧିନୀ 

ସେ ଶକ୍ତିପ୍ରଦାୟିନୀ, ଦୁର୍ଗତିନାଶିନୀ 

ଦୁର୍ଗା, ଅମ୍ବିକା, ଜୀବନଦାୟିନୀ, 

ସବୁ ଗୋଟେ ଗୋଟେ ମା'ର ନାଁ

ରୂପରେ ସେ ଭୂବନମୋହିନୀ |

 

ହେ! ତ୍ରଲୋକ୍ୟର ମହାଦେବୀ

ଶାରଦୀୟ ଧରା ବକ୍ଷେ 

ପାର୍ବଣର ମହୋତ୍ସବ ଆସିଛି,

ତୁମ ଆରାଧନା ପାଇଁ 

ମୃଣ୍ମୟର ମୂର୍ତ୍ତି ଗଢ଼ାହୋଇ 

ସିଂହାସନ ହେଲାଣି ପ୍ରସ୍ତୁତ

ତୁମେ ଉଭାହୁଅ ଆମ ପାଖେ, 

ଦେବଗଣ ବି ଆକାଶରେ ଏକତ୍ରିତ 

ଗାଇବାକୁ ଅବାହନୀ ମନ୍ତ୍ର |

 

ମାଟି, ଆକାଶ, ପାଣି, ପବନରେ 

ସବୁଠି ତାଙ୍କ ସତ୍ତା ଭରି ରହିଛି 

ତଥାପି ମା'ପାଇଁ ମଣ୍ଡପ ଗଢ଼ି

ସୁସଜ୍ଜିତ ପୂଜା ମଣ୍ଡପରେ 

ଯଜ୍ଞର ଆବାହନ ମନ୍ତ୍ରରେ 

ମା'ର ଆରାଧନା ଚାଲିଛି,

ସାରା ବାୟୁମଣ୍ଡଳ କମ୍ପୁଛି 

ଦର୍ଶନ, ଶ୍ରବଣ ଓ ମନନରେ

କାମନା, ବାସନା ଯେତେସବୁ

ଗୋଟି, ଗୋଟି ସବୁ ସ୍ୱାହା ହେବ,

ଦିବ୍ୟ ଆନନ୍ଦର ପ୍ରଭାବରେ

ଚାରିଆଡ଼ ଅମୃତମୟ ହୋଇ 

ମା', ମା' ନାମ ଝଙ୍କୃତ ହେବ |

 

ତୁମ ଆଲୋକର ତର୍ପଣ ପାଇଁ 

ମୁଁ ବି ପ୍ରସ୍ତୁତ ହୋଇ ରହିଛି 

ମୋହ, ମାୟା ମୁକ୍ତ ହେବା ପାଇଁ 

ମୋ ଦ୍ୱାର ଖୋଲା ରଖିଛି 

ଆସ ମା' ହୃଦୟ ସିଂହାସନେ ବସ

ମୋର ଇଛା ପୂର୍ଣ୍ଣ କର |

ମୋ ମନର ସାରଥୀ ହୋଇ 

ଆଗକୁ ଯିବାର ବାଟ ବତାଅ

ଭିତରର ମହିଷାସୁରକୁ ବଦ୍ଧ କରି 

ମୋତେ ତୁମେ ଦର୍ଶନ ଦିଅ |

 

ଏ ଧରା ଅପେକ୍ଷାରେ ରହିଛି ଦେଖିବାକୁ 

କେମିତି ଆଲୋକରେ ଝଲସିବ 

ତୁମ ଭୂବନମୋହିନୀ ରୂପ,

ମୃଣ୍ମୟ ମୂର୍ତ୍ତିରେ ମା' ତୁମେ ଦର୍ଶନ ଦିଅ |