ଭଲ୍ ପାଉଛେ ତମ୍'କେ
ଭଲ୍ ପାଉଛେ ତମ୍'କେ
ରାଏତ୍ ସର୍'ତା ଝୁମୁରା ଭଙ୍ଗେଇ
ଆଏଖ୍'କେ ରେତି ରେତି
ତୋର୍ ଚେହେରା ଭାଲି ଦେଉଥିଲେ
ଚଲ୍ କରୁଥିଲା ଛାତି ।
ଛାତି ଚିରିକରି ଦେଖେଇ ନାଇଁ ପାରେ
କେତେ ଯେ ପାଏସି ଭଲ୍
ପହେଲା ନଜର୍ ପହେଲା ଦେଖାଥି
କରିଦେଇଥିଲୁ ପାଗଳ୍ ।
ପାଗଳ୍ ହେଇଗଲି ଦେଖ୍'ଲା ଦିନୁ
ତୋର୍ ଗୁରା ଚେହେରା
ଭୋକ୍ ଉଡିଗଲା,ଶୋଷ୍ ଉଡିଗଲା
ନାଇଁ ଲାଗୁଛେ ଝୁମୁରା ।
ଝୁମୁରା ଆଏଲେ ଭି ଭମ୍'କି ହେଉଛେ
ତୋର୍ ନା'କେ ଡାକି
ଯାହିଁ ଦେଖୁଛେ ତତେ ହିଁ ପାଉଛେ
ଗୁରା ମୁହିଁ ହଲ୍'ଦି ମାଖି ।
ମାଖିଥିଲ ଦେହେଁ କାଏଁ ବାସ୍ ଅତର୍
ଯାଉଥିଲ କେତେ ମହକି
ଅନ୍ଧାର୍ ରାତିର୍ ଚକା ଜନ୍ ଲେଖେ
ଦିସୁଥିଲ ହେନ୍ତା ଚମ୍'କି ।
ଚମ୍'କି ଗଲି ,ହୋସ୍ ଉଡିଗଲା
ଲାଗ୍'ଲ ସରଗ୍ ପରି
ମନେ,ମନେ ଭାବିଦେଲେ ମୋର୍ ଲାଗି
ତମେ ହେଇଛ ତିଆରି ।
ତିଆରି କରିଛେ ପେରେମ୍ ପତର୍
ଦେବାର୍ ଲାଗି ତମ୍'କେ
ଛାତି ଚିରିକରି ରକତ୍ ଝରେଇ
ଲେଖୁଛେ ମୁଇଁ ତାହାକେ
ଭଲ୍ ପାଉଛେ ତମ୍'କେ ।