ଭଲ ବହିଟିଏ

ଶଶାଙ୍କ ଶେଖର ରାୟ

ଅନ୍ଧାରରୁ ଆଲୋକ ଆଡକୁ

ଫେରାଇଆଣେ ଅମଡା ବାଟରୁ

ମଣିଷଟିଏ କରି ଗଢିବାକୁ

ଜ୍ଞାନର ଛାଟ ଧରି ସଦା

କାନ ମୋଡୁଥାଏ ସେ ।

ପିଲାବେଳୁ ବୁଢା ହେବାଯାଏ

ଆଖିରେ ଜ୍ୟୋତି ଭରେ

ଦୁନିଆକୁ ଚିହ୍ନାଏ

ଓଠେ ଫୁଟାଏ ଶବ୍ଦର ଫୁଲ

ସୁନ୍ଦର ଉପବନଟିଏ ସେ ।

ଅନୁଭୂତି ଅଭିଜ୍ଞତା

କୁଟାକାଠିରେ ଗଢିଦିଏ

ବସାଟିଏ ଜୀବନ ଡାଳେ

ଶବ୍ଦମାନଙ୍କ କିଚିରୀମିଚିରି କୋଳାହଳେ

କଅଁଳ ସକାଳଟିଏ ସେ ।

ଚେତନାର ଦ୍ଵାରେ

ସଦା ଜାଗ୍ରତ ପ୍ରହରୀ

ମଥାରେ ବୋଳି ଅଭିର

ଢାଳି ପ୍ରଶାନ୍ତିର ବାରିଧାରା

ଶ୍ରାବଣର ଆକାଶଟିଏ ସେ ।

ସତ୍ୟ ଶିବ ସୁନ୍ଦର

ଅଥଳ ଜ୍ଞାନର ସାଗର

ମଣିମୁକ୍ତା ଧରି କୋଳେ

ବାଣ୍ଟୁଥାଏ ସୁରଭି

ଅମୃତର ଝରଟିଏ ସେ ।

ରହିଥାଏ ଛାଇ ଭଳି

ଭଲ ସାଥିଟିଏ ସାଜି

ଜନ୍ମରୁ ଜନ୍ମାନ୍ତର ଯାଏଁ

ଅଭୁଲା ତା ପ୍ରୀତି

ମଧୁର ସଂଗୀତଟିଏ ସେ ।

ମୋ - ୭୩୭୭୧୯୭୯୯୯

ବଟରପଡା ରାଜକନିକା କେନ୍ଦ୍ରାପଡା