ଭକ୍ତ ଭଗବାନ

ଆଜି ପରା ଆଷାଢ଼ ଶୁକ୍ଳ ଦ୍ଵିତୀୟା

ଗୁଣ୍ଡିଚାରାଣୀଙ୍କୁ ଦେଇଥିବା କଥା ରଖି

ନଅଦିନ ପାଇଁ ଜନମ ବେଦୀକୁ ଯିବୁ

ଘଣ୍ଟ ଘଣ୍ଟା ହରିବୋଲ ହୁଳହୁଳିରେ ପହଣ୍ଡି ହେବ

ଟାହିଆ ଲାଗି ଢଳି ଢଳି ଆସିବୁ

ଛେରା ପହଁରା ପରେ ଚାରମାଳ ଫିଟିବ ତାପରେ

ନନ୍ଦିଘୋଷ ଗଡିଯିବ ଶ୍ରୀମନ୍ଦିରରୁ 

ମାଉସୀ ଘର

ରଥରେ ତୁ ଏକା ପଥରେ ତୁ ଏକା

ଶୂନ୍ୟ ବ୍ରହ୍ମ ପୁଣି ଶୂନ୍ୟ ପଥ

କୋଳାହଳମୟ ବଡ଼ଦାଣ୍ଡ

ଆଜି ନିରବୀ ଯାଇଛି

ଦେବକୀ ପରି

ଆଖିରେ ଆଖୁଏ ଲୁହ 

ପଣତ କାନିରେ ପୋଛିଦେଇ

ଗୃହବନ୍ଦୀ ହୋଇଛି ଭକତ

 କେବଳ ତୋ ପାଇଁ

ତୁ କାଳେ ସଜାଡ଼ିଛୁ

ସୁଦାମାର ଦାରିଡ୍ର ପଣର ନିର୍ଯ୍ୟାସ 

ବନ୍ଧୁମହାନ୍ତିର ଶୂନ୍ୟଥାଳି

ରଘୁ ଅରକ୍ଷିତ ପରି ଗରୀବର ଚିରା ଫଟା ବିଶ୍ୱାସ

ଆଉ ଫେରେଇଦେଇଛୁ

ଦ୍ରୌପଦୀଙ୍କ କୋଟି ବସ୍ତ୍ର

ସଖାପଣରେ

କୁବୁଜାକୁ ଧନ୍ୟ ମଣିଛୁ

ଶବରୀ ଅଇଁଠାରେ ଭକ୍ତି ଦେଖିଛୁ

ପାଷାଣି ଅହଲ୍ୟାର ମୁକ୍ତି ଖୋଜିଛୁ

ପୁଣି

ସାରଥୀ ସାଜିଛୁ ଅର୍ଜୁନ ରଥରେ

ଦାସିଆ ନଡ଼ିଆ ହାତରେ ନେଇଛୁ

ରଥ ଅଟକେଇ ବଡ଼ଦାଣ୍ଡରେ

ଭକ୍ତ ମନ ରଖିଛୁ।

ଆଜି ସେଇ ଭକ୍ତ ପାଇଁ

ନନ୍ଦିଘୋଷ ଗଡୁଥାଉ 

ଭରସା ଆଉ ବିଶ୍ୱାସରେ

ଯୁଗେ ଯୁଗେ ଭକ୍ତ ପାଇଁ ଭଗବାନ।

ରଥ ଦଉଡି ରେ ପଛେ ହାତ ନଲାଗୁ