ଭିନ୍ନ ଏକ ପ୍ରେମ

ବେଳେବେଳେ ବି ଏମିତି ହୁଏ ,

ଯାହା କେହି କେବେ ଚାହିଁଥାଏ ପାଇନଥାଏ ,

ଆଉ ଯାହା ଚାହେଁ ନାହିଁ ତାହା ପାଇଯାଏ,

ନିଃସର୍ତ୍ତରେ ବାରମ୍ବାର !

ପାଇବାର ସର୍ତ୍ତ କ'ଣ ଯେ ?

ବାସ୍ ଯାହା ମିଳେ ଥଳିରେ ପୁରାଅ ,

ଓ ନିଃଶବ୍ଦରେ ଚାଲିଯାଅ ଆପଣା ଗନ୍ତବ୍ୟ ପଥରେ ।

ପରେ ଖୋଜି ଦେଖ ,

ଯାହା ପାଇଥାଅ ଆପଣା ରାସ୍ତାରେ ।

ଯଦି ପ୍ରାପ୍ତରେ ଥାଏ ଚୁମାର ଟିଫିନ୍ ବୋମା ,

କି ଆର୍ ଡି ଏକ୍ସ ପ୍ରେମର ଗନ୍ତାଘର ?

ସେବେ ନିଜ ଅପାରଗ ପଣରେ ଧିକ୍କାର ଆସେ ,

ଯାହା ପାଇଥାଏ ଜାଣିଯାଏ ତାହା କିଛି ନୁହେଁ ।

ଦେହର ଊର୍ଦ୍ଧ୍ବ ରେ ଆଉ କ'ଣ ବା ଥାଏ ?

ତା ପରେ ଆଉ କ'ଣ ରହିଲା ଯେ ?

ସବୁ ବିସ୍ଫୋରକର ତ ଶେଷ ପରିଣତି ବିସ୍ଫୋରଣ ,

ଠିକ୍ ଶସ୍ତା ପ୍ରେମର ଅଗଣିତ ଗନ୍ତାଘର ପରି ।

ତା ହେଲେ ଇଏ କ'ଣ ସେଇ ପ୍ରେମ ?

ଯାହା ଘଟେ ଦେହରେ ଦେହରେ ,

ନା ଯାହା ବହିଯାଏ ଦେହାତୀତ ଅଲଂଘ୍ୟ ନଗରେ ?

ସେଥିପାଇଁ ଆରମ୍ଭ ଏହା କେବେ ଦେହରେ ,

ପୁଣି ଶେଷ କେବେ ଲୁହ କି ଲହୁ ରେ ,

ଅବା କେଉଁ ଅପ୍ରାପ୍ତି ବୋଧରେ !