ଭାଏ ଜିଉଁତିଆ

କେତେ ଗହ ଗହ ଲାଗୁଅଛେ

ଆଏଲା ନ ଦସହରା ପୁନୀ,

ଉପାସ୍ ରହି କରବେ ଭାଏ ଜିଉଁତିଆ

ଭାଏର୍ ଲାଗି,ସବୁ ବହନୀ ।

ଭାଇର୍ ମଙ୍ଗଲ୍,କାମନା କରି

ମାଁ 'କେ କରୁଛନ୍ ଅର୍'ଦଲି,

ମୋର୍ ଭାଏ କେ ବନେ ରଖିଥିବି 

ତୁଇଁ ଗୋ ସାହା ସମଲେଇ l

ତୋର୍ ପାହାତଲେ କରୁଛେ ପୂଜା

ଉପାସ୍ ,ବରତ୍ ରଖି,

ଦୁଃଖ୍ ମନା କରବୁ ନାଇଁ ଗୋ ମାଁ

ମୋର୍ ଭାଏ ମୋର୍ ଆଖି ।

ସବୁ ଦୁଃଖ୍ ବିପଦ୍ ମତେ ଦେବୁ

ଭାଏ କେ ରଖିଥିବୁ ସୁଖେ,

ମୋର୍ କିରିଆଁ ଲାଗ୍'ଲା ମାଁ ତତେ

ଉପାସ୍ ରହୁଛେ କେତେ ଦୁଖେ ।

ଗେଲେଇ ବହନୀ କହି ଭାଏ ମୋର୍

ଲାଡେଗଲେ ମତେ ରଖିଛେ,

ତୋର୍ ଛତର୍ ଢାପି ରଖ୍'ବୁ ସମଲେଇ

ତତେ ସାଖି ରଖି ଜିଉଁତିଆ ବାନ୍ଧୁଛେ ।