ଭାବର ଠାକୁର

ଭାବର ଠାକୁର

ଅନିରୁଦ୍ଧ କୁଣ୍ତ

*********************

ଭାବର ଠାକୁର  ଭାବକୁ ଆତୁର

    ଭୁବନମୋହନ ହରି

ଭାବରେ ଡାକିଲେ  ଭବ ସାଗରରୁ

    ଭାବଗ୍ରାହୀ କରେ ପାରି ॥

ଭାବରେ ଦାସିଆ ଶ୍ରୀଫଳ ବଢାଇ

   ଡାକିଦେଲା ହରି ହରି 

ଭାବାବେଗେ ପ୍ରଭୁ  ଭାବ ଲଗାଇଲେ

     ଦୁଇ ବାହୁକୁ ପ୍ରସାରି ॥

ଭାବରେ ବାଇଆ ଭାବ ବିନୋଦିଆ

     ସଖା ସୁଦାମାକୁ ଧରି

ଖୁଦଭଜା ଖାଇ  ଭାବରେ ବିହ୍ବଳ

       ସେହି ଭାବର ଭିକାରି ॥

 ଶବରି ଅଇଁଠା  ଶ୍ରୀବତ୍ସ ଗୋଇଠା

      ଲାଗିଲା ଭାବର ଡୋରି

ବନ୍ଧୁ ମହାନ୍ତିର  ବନ୍ଧୁ ପଣିଆରେ 

       ବନ୍ଧା ପଡିଗଲେ ହରି ॥

ଭକ୍ତ ସାଲବେଗ ଭାବରେ ଡାକିଲା

       ଅଟକିଲେ ରଥ ଧରି

ଭକତ ବତ୍ସଳ ଭାବରେ ବିହ୍ବଳ

      ଭାବମୟ ନରହରି ॥

ସମର୍ପଣ ଭାବ ପକାଏ ପ୍ରଭାବ

       ଦେଖ ସମର୍ପଣ କରି

 ପୂର୍ଣ୍ଣବ୍ରହ୍ମ ପାଶେ ପୂର୍ଣ୍ଣ ସମର୍ପଣ

      ଆଣିଦେବ କୃପା ବାରି ॥