ବେଙ୍ଗ ରାଜା, ବେଙ୍ଗୁଲି ରାଣୀ ଓ ବରଷା

     ମଉସୁମୀ ଆସି ଖବର ଦେଲା

     ଗୀରୀଷମ ଗଲା ବରଷା ହେଲା

             ହଇରେ ହଇ ହଇ

     ଚାଷୀ ଭାଇଟି ସଜଲି କଲା

             ହଳ ଲଙ୍ଗଳ ମଇ ।।

     ବେଙ୍ଗ ରାଜା ଆଉ ବେଙ୍ଗୁଲୀ ରାଣୀ

     ବରଷା ଆସିଲା ଆଗରୁ ଜାଣି

               ଉଆସ ଛାଡ଼ି ଗଲେ

     ସାରୁ ଗଛର ମୂଳରେ ବସି

               କେଁ କଟର କଲେ ।।

     କଟର କଟର କଟର କେଁ

     ଆ'ରେ ବରଷା ପାଣି ତୁ ଦେ'

              ରାଇଜ ସାରା ଆମ

     ଖୁସି ଲହରୀ ଯିବରେ ଖେଳି

              ଲାଗିବ ଚାଷ କାମ ।।

     ସବୁଜ ଶୋଭାରେ ହସିବ ଧରା

     ଗଛ ଫୁଲ ଫଳେ ହେବରେ ଭରା

              ରାଇଜୁ ଯିବ ଦୁଃଖ

     ହେଲେ ତୋ ଦୟା ପରଜାକୁଳ

              ପାଇବେ ପରା ସୁଖ ।।

     ବେଙ୍ଗ ବେଙ୍ଗୁଲୀର ଏତକ କଥା

     ଶୁଣି ବରଷାର ଘୂରିଲା ମଥା

              ଗରଜି ଘୁଁ ଘୁଁ

     କହିଲା ଏବେ ବରଷିବାକୁ

              ଆସିଛି ପରା ମୁଁ ।।

     ତହୁଁ ମେଘ ଖଣ୍ଡେ ଆସିଲା ଭାସି

     ଉପରକୁ ଚାହିଁ ହସିଲା ଚାଷୀ

               ପଡିଲା ଟୋପା ଖସି

      ବେଙ୍ଗ ବେଙ୍ଗୁଲୀ ଛାଡିଲେ ରଡି

              ମୁରୁକି ହସ ହସି ।।

      ଚଷା ପୁଅ କ୍ଷେତ ଭରିଲା ଜଳେ

      ଧରଣୀ ଶୋଭିଲା ଫୁଲ ଓ ଫଳେ

              ସଭିଏଁ ହେଲେ ସୁଖୀ

      ବେଙ୍ଗ ରାଜାର ରାଇଜେ କେହି

              ରହିଲେ ନାହିଁ ଦୁଃଖୀ ।।